النهارده لغايه دلوقت يوم مش تمام بجد الحمد لله علي كل حال
تصرفاتي اوفر اوي من أول اليوم وتحديدا بعد ما اخو أحمد أتى للزياره
كنت في مكتبي ومرحتش أسلم عليه رغم ان الناس كلهم كانوا متجمعين في المكتب اللي جنبي ومحمد أبراهيم جالي عشان ياخدني وكان بيغريني بأن أخو أحمد جاي باللبس الميري يعني ممكن أخد الكاب بتاعه ألعب بيه زي المره اللي فاتت بس انا قلتله أنا في أيدي شغل
وفعلا كنت من الصبح بعمل شويه شغل هسس بس انا عارف ان كان ممكن يستنى بس مكنتش عايز أروح
وبعدها لما كان يحصل ويكون حد في مكتبي ويقولي تعليق كنت أضحك ضحكتي اللي بقول عليها خليعه وحاتم بيقول عليها مصطنعه
وعديت من قدام مكتبهم كذا مره وانا رايح للمهندس خياط او راجع من عنده بس برضه معدش أسلم وحتى لما كان المهندس خياط وانا في مكتبه يقولي تعليق كنت أضحك بطريقه مفتعله وسخيفه
كان الموضوع كله موترني
مش عايز حد يبصلي ومع ذلك كنت بلفت الأنظار لأن صوتهم كان عالي وبالتالي انا رفعت صوت الاغاني عشان اعرف اركز في الشغل وصوتهم ميشوشرش عليا ومع ذلك سمعت لما محمد سأل هو مين مشغل الاغاني وعصام قاله اني انا
بعدها كان أحمد بيحكي الموقف بتاع امبارح لما مستر برني طلب شغل وكان كل واحد فينا شغال في الجزء اللي يخصه وبعدها قلتلهم انه قالي اننا نعمل الشغل مره تانيه بطريقه تانيه وأحمد أنفعل وقالي انه مش هيعيد الشغل
أنا تعبان
أخدت من عصام الصبح دوا للمغص ومع ذلك مرحش ومع ذلك مرحمتش نفسي وطول اليوم أكل شيبسي رغم ان كل الناس بتقولي ان اللي بيتعبني هي الحاجات دي
أخدت كمان قرص بندول وبرضه الصداع مش عايز يروح وبرضه منزلتش العياده اخد تحويل واشوف اخره كل ده ايه
مستر برني اخر رسمه شافها قالي دي كويسه وحسيت انه مبسوط بس انا لسه مش مبسوط
2 comments:
السلام عليكم. حكاية المغص و الصداع دي على فكرة مش غريبة عليك ابدا و لا عليا انا كمان. انا زيك في المشكلة دي و الاسباب معروفة لينا. كتبت مرة انك ما بتحبش نفسك و ما بتعرفهاش كتير, رغم انك على فكرة من اذكى الناس و عندك فطنة عالية جدا, لكن لسبب او اخر انت ما بتعترفش مع نفسك ب ده. قلقك المستمر و اهتمامك الزايد بردة فعل او افكار الناس عنك مش مفيدة و حتبعدك عن السعادة و راحة البال اللي نفسك اوي فيها. اهم حاجة دلوقتي تعملها انك تسيبك على راحتك, يا اخي كفاية الي عامله بنفسك و مين قاللك انه مش طبيعي التفكير بالشكل ده او انه يكون عندك حد ساعات مش قادر تواجهه؟ ولو انه من الاسهل تواجه الحد دة و بالبتسامتك العريضة اللي حارم الدنيا منها, تقولوا ببساطة انك نفسك تساعد الشخص المعني بس ماعندكش فكر صافي عشان تخلص في تقديم العون ليه. و بالتاكيد ماحدش عايز مساعدة مش كاملة او نص نص و لا انت ايه رايك؟ :)
ممكن تهدا شوية :) و تاخد نفس عميق؟ ليا طلب بسيط: اللي هو انك تعمل اللي انت حاسس بيه! النصيحة دي مش لاي حد يعملها, عشان دي مخصوص ليك انت. جرب و قول لي ايه اللي حصل معاك, بس يا ريت ما تكون ردود افعالك قاسية على نفسك او عالغير.
و سلامتك من الصداع مرة تانية
وحدة ما تعرفهاش :)
عزيزتي المجهوله
عليكم السلام ورحمة الله وبركاته
انا بصراحه مستغرب جدا من الكومنت
لأني اللي تعرف اني بكتب هنا صديقه عزيزه مش واحده معرفهاش ولا مجهوله
يمكن لو كان التعليق من ولد كنت شكيت في ناس تانيه
بس من بنت فمستغرب شويه
كمان الأسلوب يمكن يحسسني انها هي
يعني السلام عليكم في البدايه والوشوش اللي بتضحك والاهم انها بتشوفني حد كويس وده عكس حقيقتي
بس اي كان سواء كنتي فعلا صديقتي العزيزه او كنتي فعلا وحده معرفهاش فأحب أقولك اني مش عندي اي فطنه ابدا
عارفه لما تقولي لولد صغير على حاجه غلط ويكررها ويرجع يكرر الخطا تاني
هو ده أنا وده كان سبب من الاسباب اللي خلتني اسمي المدونه يوميات طفل كبير
لني لغايه دلوقت مش عارف اتعلم من اخطائي عشان مكررهاش
انا فعلا يمكن دلوقت سايب نفسي على راحتها وموقف الكلام مع كل الناس وكان نفسي كمان مشتكيش حتى في مدونتي بس مقدرتش ومع ذلك مش مستريح
كل شويه سؤال من شخص انت ليه متغير
والسؤال صعب عليا
والاجابه اصعب
اللي حاسس بيه مش هقدر اعمله دلوقت للاسف لأني في شغلي واللي نفسي فيه دلوقت أني انفجر في العياط ومسكتش لغايه ما انام من كتر التعب
بس نفذت النصيحه دي امبارح وعملت اللي حاسس بيه وكنت ساعتها في البيت وبيكلمني صديقي العزيزوكلمته بصراحه انه من حقي اني اسكت وقت ما احب وانا بكده مبأذيش حد وكانت النتيجه اني اذيته
فتفكري انتي انك لسه شايفه انه صح اني اعمل اللي نفسي فيه؟؟؟؟
Post a Comment