16/12/2009

النهارده الصبح حاتم سألني لو فيه حاجه بتحصل

وأحتارت

اقول ايه

او بالاصح مقولش ايه

وبعدها حاولت اتصرف عادي وكأن مفيش حاجه

يارب الاحوال تتصلح عشان انا بجد خلاص

يارب

يارب محدش يعرفني

يوم ملعون

بكره اخر يوم قبل وقفه عرفات
مستني الداتا بتاعت البريشير سرفاي للبير الجديد ايه تسعه
في السرير
قدامي اللاب توب
وشيرين بتغني
مش هستنى العمر يعدي
مش هسكت لازم اقول

النهارده احمد شوقي قالي اني مش بفكر زي المهندسين
انا اعرف عني الحقيقه دي بس اضايقت لما قالي كده

بس هو عنده حق

مش عارف مبعتوش الداتا ليه ويخلصوني
زهقت من الانتظار
والتليفون كل دقيقتين يرن
المهندس خياط والمهندس خالد وكمان بيقولولي ان يمكن المهندس غنام من الحقول يكلمني

مش بحب يكون فيه كلام كتير
مش كان ممكن اخلص الشغل وابعتلهم مسدج بالنتائج
مبحبش الحوارات
ومبحبش السهر
بس كنت من شويه عايز انام لكن دلوقت خلاص راح النوم

أنا مالي

مش عارف مالي
ولا ليه متغير حالي
كل اللي أعرفه اني متغير
ومش تغيير عادي
مخنوق يمكن
متضايق احتمال
بس الاكيد ان مفيش سبب محدد لده

عيد سعيد

النهارده شكله اخر يوم رمضان
والنهارده اول يوم مانزلش فيه الشغل من ساعه اليوم الوحيد اللي ما روحتش فيه لما سافرت اسلم على داليا قبل سافرها
بس زهقان موت
مش عارف ليه
مش عايز افضل في البيت
ومش عايز انزل لوحدي
ومش عايز اعمل اي حاجه
ودماغي مش عارف افكر في حاجه معينه

مشتت شويه
يمكن بفكر في بكره والشغل اللي مفروض اعمله

انا شكلي بقيت متضايق على طول

مش عارف مالي

ايه اللي مضايقني تحديدا

المهندس ابراهيم دايما يكلمني ويتعامل معايه على اني مش بفهم

ومش بشوف شغلي

ويمكن بعطله عن شغله كمان

بس النهارده الموضوع بقى بجد اوفر

يعني اهو من اكتر من اسبوع والمهندس خياط بيتحايل عليه عشان يخلص الشغل اللي عنده وهو ولا هو هنا واجازات براحته

بس انه يقول اني انا اللي معطله وبديله معلومات مغلوطة بجد

متضايق

مخنوق اوي منه

ومن نفسي

ومن الشركة

ومن المديرين

متضايق

متضايق اوي
مخنوق
مش مبسوط
مش مستريح
قرفان

كل اللي بيحصل في الغل الايام دي خانقني اوي
مش طايق حد
والاهم اني مش طايق نفسي
مش راضي عنها

نفسي اكون كويس
نفسي اخد بالي من شغلي اكتر
نفسي اكون بني ادم احسن

مخنوق اوي


يارب فكر كربي

عايز اكمله من امبارح ومش عارف

مكنتش متوقع امبارح اني هتأخر كده

لما نزلت من البيت كنت لسه مقررتش هعمل ايه في الخروجه

كمنتش هقابل حاتم بالتكشيره اللي قابلته بيها لو مكنش بعت المسدج اللي بعتها قابل ما قابله واللي بيطالبني فيها اني لو كنت لسه ملبستش فمجهزش واستناه هيعدي عليه

ساعتها اتصورت ان الميعاد اتلغى او هو غير رأيه ومش عايزني معاه والاتنين مريحونيش لكن لما قابلني

واكتشفت ان بس الميعاد اتأخر شويه فمكنش عايزني اجهز من بدري بس فضلت متنح

عايز اكمل بس بجد مش قادر

مخنــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــوق

مش عارف ايه السبب؟

حاتم قالي نقابل اصحابه بعد الترويح
مش عارف قالي المره دي ليه اروح معاه
لما لاقيني سألته السؤال اكتر من مره
قالي عشان مش في وقت نخرج
وفرصه يعرفني على ناس كويسه


مش عارف

خايف من نفسي وتصرفاتي السخيفه
مش عارف وافقت ليه
عشان هو طالب؟
ولا عشان عايز اكون معاه؟
ولا فعلا بفكر انها فرصه اتعرف على ناس كويسه

ولا يمكن عشان اتعرف على اللي قال عليهم اصحابه مش زميله لأنهم بكده هيكون في حاجه مشتركه بيني وبينهم


مش عارف مالي


ليه بصمم اكلكع الأمور


مش عارف ليه كلمت احمد
مقولتلوش طبعا اني هخرج او مش هخرج كل اللي قتهوله كل سنه وهو طيب عشان بكره عيد ميلاده


هو انا ليه صحيح ماشترتلوش هديه؟

عيوبي

امبارح في جلسه حديث مع حاتم سألته عن تلات عيوب فيا فقالي
اول عيب اني مبتعلمش ودي م اول مره يقولي على العيب ده فيا
بس برضه لسه مبتعلمش
مش عارف ليه
يمكن لأني عنيد بطبعي
بس ده انا بستسهل في حاجات كتير
مش عارف

العيب التاني
قالي اني بدي الناس اللي هما عايزينه
بريح اللي قدامي يعني
مش عارف بحس ان العيب ده كأنه بيقولي مليش شخصيه مع اللي قدامي
او شخصيتي من النوع التابع
مش عارف

العيب التالت
قالي اني بزعل بسرعه وبروق بسرعه
وان ده مينفعش لأن كتير بيكون الموقف مش محتاج زعل
واحيانا بيكون الموقف مينفعش يعدي بسرعه

مفهمتش بصراحه اوي لأنه رفض يديني امثله

بس دي جزء من عيوبي من وجهة نظره

غيره وعند

الاسبوع اللي فات وصل من شركة روكسر العرض الفني للشغل المتعلق معاهم ويوم ما وصل على الايميل قلت للمهندس محي رغم انه كان فيه لسته الاسامي يعني كده كده كان هيشوف الايميل عنده بس هو قالي ان الايميل مش وصله وقالي ابعتهوله وبعدها لاقيته دخل لهاري وبيكلمه فيه فأتضايقت

يوم الاحد هاري قالي عايزين نقعد ونقيم الكلام اللي بعتوه قلتله حاضر وهو مش قالي تاني طول اليوم وانا مرحتلوش
يوم الاتنين هاري تاني دخل وقالي قلتله حاضر ورغم اني اليوم اللي قبله كنت كتبت ملاحظاتي على الورق بس قلتله حاضر وبس فخرج وراح لمحي وقاله وساعتها محي دخل عليا يقولي فقلتله على الملاحظات بتاعتي فقالي خلاص عايزين نكتب الكلام ده وقلتله انا معايه البريزنتيشن بتاعت المهندس الخياط فقالي هكتبه أنا

ومكتبش ملحوظه واحده زياده عن ملاحظاتي واي نعم لما دخل لهاري شوريلي عشان ادخل ودخلت وفجأت برد فعل هاري اللي اتبسط جدا من شغل محي يمكن لو كنت كتبت الكلام مكنش هيتبسط مني وساعتها قلت كفايه اني عارف ان الملاحظات كلها بتاعتي بمفرادتي في التعبير عنها لمحي بس مكنش عندي الشجاعه ولا الثقه في اني اكتبها واقدمها وقلت محي يتصدر هو وهو بيحب كده

مش في اي تفسير لضيقي بعدها غير الغيره



كل الناس امبارح بتسأل انا متغير ليه ومع ذلك محاولتش ابتسم ولا مره ولا اتكلم عادي حتى لما احمد فضل يكلمني في مكتبي شويه وفي مكتبه شويه لوحدنا ساعات وقدام الناس ساعات برضه مغيرتش موقفي
بس اللي كان بجد بشع مني لما الح عليا اروحله البيت وفضلت في البيت عنده ساعه مسمعش مني غير كم كلمه نعم يتعدوا على الصوابع ورغم كل الكلام اللي قاله والمحايله اللي اتحايله مغيرتش موقفي

حتى في الأخر لما قالي لو في يوم سألتك مالك أو متغير ليه اشتمني ومش هقولك حاجه لأني هكون انا اللي استاهل متأثرتش ولا لما قالي انه تعب جسديا وراح للدكتور ولما قاسله الضغط قاله هو انت بتفكر في ايه الايام دي

بس اللي بجد كان بشع لما في الأخر قالي حسبي الله ونعم الوكيل

طيب هو انا مش من حقي اني امتنع عن الكلام؟

خبث

حاسس اني بجيد تعذيب الآخرين

زي ما أكون مستمتع والناس كل شويه يسألوني مالك مش مفرفش زي زمان ليه

الموضوع مش متعب

ابتسامه مزيفه أجيد رسمها

وضحكه مفتعله أجيد تصنعها

وشويه كلام ملوش اي علاقه بحقيقتي ولا بمشاعري

والدنيا تمشي

والناس تبطل تسأل في ايه ومين مضايقك

المهندس محمد أسماعيل بيسأل وامبارح عرض انه يكلم المهندس عبد الخالق شخصيا ويجيبلي اجازه لو المهندس الخياط عنده مشكله وانا قلتله أنا اللي مش عايز اجازه فيه شغل وهخلصه وبعدين اشوف

عصام حاسس انه هو اللي مزعلني عشان الموقف اللي حصل في الموقف مع جاره

موسى حاسس انه هو اللي مزعلني عشان موقف الجرنال مع المهندس خالد

احمد فاكر انه هو السبب في حالتي عشان المشاكل اللي بينا

حتى حاتم

كئبت عليه وعملتله مشكله من غير داعي

لو انا فعلا بس محتاج اسكت شويه ممكن اسكت من غير ما أزعل الناس دي كلها

انا ليه بعمل فيهم وفي نفسي كده غير لو كنت فعلا مريض وبحب اعذب نفسي واللي حواليا

بس يمكن كمان الموضوع ابسط من كده وانا بس عايز افضل شويه من غير اي تصنع من غير اي قيود ومن غير ما يكون بيؤرقني زعل ده او غضب ده

انا متضايق من نفسي اوي ومش عارف اعمل ايه

اتكلم عادي مع الناس وكأن مفيش مشكله واجي لغايه اقرب الناس واصمم على سكوتي واني مش عايز اتكلم مش هرتاح

اسكت مع الناس كلها واجي لغايه عنده هو واتكلم مش هرتاح

بسكت مع الناس كلها مش برتاح

سألني مره من كم أسبوع لما قلتله أول مره اني محتاج اسكت وقالي مع الناس كلها ولا معايه انا بس فرديت وقولت انت الناس كلها ومش كنت بكدب

أنا فعلا يمكن أكون بحكي حاجات كتير ويمكن ساعات لتاس بقبلها صدفه في مواصله او في مناسبه بس بيفضل هو كل الناس اللي حابب اني اشارك معاه كل حاجه

بس مش مفروض اكون اناني

يمكن تكون سفريه اسكندريه هي السبب

يمكن يكون الموضوع من زمان

الموضوع دلوقت مبقاش ان لسانه بيقول كلام وتصرفاته بتقول كلام ول حتى اني مستهلوش وانه يستاهل الافضل

بس فعلا انا يمكن اكون عقبه في طريقه ومش بس كده كل اللي بلوم عليه في احمد انا بعمله معاه حاسس اني بأذيه جامد وفعلا مش هقدر اكمل كده

لازم افكر في مصلحته قبل مصلحتي وبيتهيألي مش معقوله أكون بسكوتي كمان بأذي الناس

يارب وفقني للخير

12/7/2009

النهارده يوم مش حلو

مش عارف ليه مش بقيت بكتب هنا غير في الايام المش حلوه

انا مش بقيت بحبني

أنا اصلا مش فاكر انا كنت امتى بحبني

بس انا دلوقت مش بحبني خالص

متضايق

مش قادلا أكون حد كويس في تعامله مع الناس

مش قادر ارسم ضحكة على وشي

مخنوق

23/6/2009

يومي النهارده كان بشع بكل المقاييس

هاري حسيته متضايق مني

انا كنت متضايق من نفسي

كان عند استاذ خلف في الاربعتاشر وانا طالع ننازل من السبعتاشر للاربعتاشر كذا مره وكلها عشان حاجات تافهه

مفروض اكون مركز اكتر من كده

البئر الجديد كارهه وكاره الشغل عليه بالذات اخر واحد اتفقه عليه

انا عارف انه مش حاجه بايديه انه على الموديل بيجيب انتاج قليل وان مفيش حاجه لو قلت لهاري كده بس مقدرتش اقوله

محمد لبراهيم تعبني النهارده وضيعت وقت طويل عشان انقله الافلام اللي كان عايز ياخدها وكنت ممكن اركز في الوقت ده واخلص شغل من اللي ورايا بدل ما حسيت اني كنت بتدلع في الشغل

يااااه نفسي اليوم يخلص

22/6/2009

النهارده بغلونب الخبر التعييس اني مسئول عن التقرير السنوي للسنه الثالثه على التوالي

حاجه تقرف

مش بس كده لأ كمان هيكون احمد هو اللي بيتابع في غيابي

كان اليوم بجد دمه تقيل

نفسي الاسبوع يخلص

21/6/2009

اليوم النهارده كان دمه تقيل بشكل رخم

المهندس خياط كان بيزعقلي عشان غلطه هي مش غلطتي اوي بس كمان مش غلطتي كلها

مش عارف مالي

يمكن صحيح زي ما بيقولوا اني بركز في امور شخصيه كتير بتخليني مركزش

عايز اركز

عوده

فجأه لاقيت كل حاجه غير
تصرفاتي غير
شخصيتي غير
يمكن ملامحي كمان غير

النهارده قررت اني اخرج من القوقعه
قررت اني ارجع تاني امارس حياتي
مش لازم اخاف
ايه يحصل لو مين قرا كلامي
ايه يحصل لو مين شاف اللي جوايا

المهم اني في الآخر أكون أنا
أخرج اللي جوايا عشان اقدر اعيش

انا خايف

انا خايف أوي

مش عارف أنا بعمل كده ليه

ليه ساعات الواحد يقول كلام غير اللي يحسه

نزلت من البيت وانا عارف اني بتلكك لما بقول اني نازل اشتري حجه

وكنت بتلكك اكتر لما بقول اني هشتريها من جنبه البيت عندك

وانا في نص الطريق لاقيت رسالتك عشان صلاة المغرب

رغم اني ياما قلتلك زمان وانت مكنتش بتهتم ليه دلوقت بقيت بتهتم وبتبعتلي رسايل طول اليوم

انا عارف انك متقصدش ومبيخطرش على بالك اد ايه بيحسسني اني قليل الذوق

قلت هعدي عليك

وقفت تحت البيت وبعت مسدج ولاقيت ساعتها حد وقف في اشلباك ورغم اني حسيت انه مش انت بس فضلت واقف وبعد زمن رنيت الجرس وقلولي انك مش موجود

بعتلك تاني وتالت لاقيتك بتكلمني رديت بغلاسه
كان نفسي ساعتها اقولك اني محتاج اتكلم معاك

اني بكدب لما بقولك اني مش عايز اشوفك

انا خايف

انا حتى مش قادر افكر في الكلام اللى انت قولته يوم الجمعه

قلتلي ساعتها انك كده مسبتنيش

لأ أنت غلطان انت برضه عملت اكتر حاجه اتحايلت عليك كتير انك مش تعملها

سبتني في الشارع ومشيت

تعرف اني فضلت واقف في مكاني ساعه مش عايز امشي يمكن ترجع

انا متضايق اوي

مش عارف اعمل ايه

محتار انا في حالي

مش عارف اعمل ايه

مش عارف مالي

يارب ساعدني

يارب وفقني

مش عارف انا اللي بقفل

ولا الدنيا هي اللي مقفله

خلاص حاسس انها يمكن تكون بجد دي النهايه

انا عارف ان الصداقات في حياتي مش بتدوم

ودي مش مجرد صداقه

مش عارف

مش عايز افكر في اي حاجه دلوقت

يارب يسرلي الخير

انا وحشتني

أنا مش لاقيني

فوضى

الأمور كلها خرجت عن السيطره مش عارف اعمل ايه

من ساعه ما احمد قالي اعترافه الخطير بأنه كان على مدونتي التانيه وانا ايامي بقيت غريبه

شكلي بتلكك

شكلي زي ما حاتم بيقول بحب اعيش في دراما

مش عارف اركز خالص من ساعتها مش عارف ليه

مش عارف اذاكر ومش عارف حتى اقرا في اي شيء

حتى مشوار المكتبه كسلت اعمله

يوم الجمعه أحمد قالي تعالى معايه وساعتها قلتله عندي مغص واعتذرت

ويوم السبت مش قالي أروح

يوم الاحد فضلنا طول النهار في الشغل بنتكلم وكنت صريح معاه بس مش عارف برضه ايه اللي بيحصل

روحت معاه يومها ومش عارف ليه وفضلت عنده لغايه الساعه عشره

يوم الاتنين كمان روحت معاه بعد الشغل بس مشيت الساعه خمسه ونص عشان كنا هناك من قبل العصر

النهارده مروحتش معاه

عايز ابعد بعيد عشان اعرف اركز وبرضه مش ببعد عشان اركز ومش عارف اركز وانا موجود

النهارده شفت على كمبيوتر احمد الكومنتات اللي كان كتبها تعليقا على كلام اننا كتبته عنه

مش عارف انا مالي

يارب اهديني للخير

صمت

مش عارف ايه اللي حصلي
لما أحمد قالي أنه دخل المدونه بعد وعده ليا انه ميدخلهاش
هو بيقول انه بس قال انه مش هيدخلها لكن موعدش
مش هتفرق دلوقت
المهم انه دخل

احتارت واستغربت
وجريت على البيت وقفلت المدونتين رغم اني فهمت من كلامه انه دخل واحده بس

لكن دلوقت وانا بتفرج على فيلم لفت نظري جمله
when you don't know what you do, Do NOTHING

فعلا انا بعمل كده كتير في حياتي بس انا اول ما حسيت بالهلع امبارح اسهل حاجه كان ممكن أعملها أني أقفل المدونه اني كمان اقفل تليفوني
واني اخد اجازه من الشغل
بس خلاص
انا فعلا مفروض معملش حاجه لغايه ما أقرر

حيره

مش عارف مالي
متلغبط ليه؟

يوم الأحد خرجت مع حاتم
قضينا وقت كويس
قعدنا في سيلنترو اللي في جامعه الدول جنب الشغل شويه وبعدين اتغدينا في مؤمن وبعدين روحنا كنت في البيت على الساعه سبعه تقريبا وكنت مبسوط أننا قضينا وقت كويس

مش عارف ليه بتكلم كتير
عارف اني مفروض اقلل كلامي وبرضه مش بقلله

حاسس بفراغ شويه جوايا ومش عارف سببه

هاري أجازه لمده تلاته اسابيع ابتداء من لااسبوع اللي جاي يمكن يكون عشان الايميل اللي بعته واللي فيه خطة التلات اسابيع دول
مأعتقدش لأنه مش أول مره يعملها

مش عارف مالي
عايز أركز

وليد حاول يتصل أمبارح وانا كنت محول التليفون واستغربت أنه هو اللي حاول يتصل رغم اني كنت متوقع أتصال أحمد عشان كده حولت التليفون بس وليد اللي اتصل
كويس ان التليفون كان متحول لأني لو رديت عليه كنت ممكن المره دي اوافق اننا نتقابل
لأنه بالتأكيد كان بيتصل عشان يقولي نتقابل

غريبه أنه لسه فاكرني

مش عارف اركز برضه
هو ايه سبب عدم تركزي

يمكن يكون أحمد؟
وليه ميكونش أي حاجه تانيه

وليه ميكونش انا السبب في عدم تركيزي

أنا اللي مصمم أشتت نفسي

مش وقت صراع مع نفسي دلوقت

عايز افكر في حاجات ايجابيه

صح اللي مخليني مش عارف أركز هو كتر تفكيري في حاجات سلبيه

بقول اني مزعلتش من كلام المهندس أبراهيم لما قالي أني لما نقلت في المكتب اللي جنب المهندس خياط بقيت سكرتيره الخاص لكن محي لما كان في المكتب كان نائب المهندس خياط

قلت ان الكلمه ساعتها ضايقتني بس الحقيقه انها لسه مضيقاني وبالذات لما كررها تاني أمبارح قدام توكل

كمان طريقه تعامل خالد معايه مبقتش مريحاني

مش عايز افكر

هو ده انا اول ما أبدأ أفكر في اللي مضايقني بجد أهرب من التفكير أنا هخرج من المكتب أدور على حاجه أعملها او أبدأ مذاكره

صدفه

امبارح غلطت غلطه رهيبه

حاتم سألني صوتك ماله متغير بقالك يومين فغلطت وقلتله ان السبب أحمد بس مش هينفع نتكلم عشان انت مبتحبش الكلام في الموضوع ده

مكنش مفروض من الاساس اني اقول ان في مشكله وانها متعلقه بأحمد وكمان مكنش ينفع بعدها اقوله اني مش هقوله عشان هو مش بيحب يسمع كلام في الموضوع ده

بس اليوم عدى اي نعم النهارده لما لاقى صوتي متغير وسألني وانا قلت مفيش قالي انه زعلان عشان انا بخبي عليه بس انا عارف ان كده افضل من اني اتكلم معاه في موضوع احمد

أيه ده

صح

انا دلوقت فهمت

اللي كان عملي مشكله الكام يوم أني مش كنت بتكلم في موضوع احمد

صح

الحمد لله اني اخيرا فهمت

بقالي يومين مش عارف مالي لدرجه اني فكرت اكلم أحمد نفسه

بس دلوقت فهمت توترت الامور اليومين دول واني مش بحكي لحد هو اللي عمل المشكله

الحمد لله على الفهم واللهي الفهم حلو

النهارده اشتريت الكتاب اللي ههديه لحاتم كنت عايز اشتري لنفسي كمان كتاب بس كنت تعبت من كتر التدوير على كتاب لحاتم اي نعم كان ممكن اخد اي روايه من الروايات اللي عجبتني واللي مكنش ينفع اخد واحده منهم لحاتم لأنه مش بيعز الروايات اوي بس مش عارف ليه أخدت كتاب حاتم ومشيت وخلاص

مش لفيت كتير في وسط البلد عشان كان لسه الوقت بدري ومفيش محلات كتير فاتحه دخلت محل

nike

بس مكنش عنده شنط كويسه ومش عارف ايه اللي مخليني متردد اروح اجيب الشنطه اللي كانت في جنينه مول رغم ان عشان الخصم اللي عليها زمانها اتباعت خلاص

رحت على الشركه مكنش في حد شويه ولاقيت الصداع عمال يزيد وعشان كان معايه الشنطة الصغيره مكنتش حاطط فيها البنادول ومفيش اي مسكن في الشغل عايز اسيب دايما حاجه في درج مكتبي للصداع اللي مش عايز يسبني ده

اشتغلت شويه واتفرجت على النت شويه وبعدين قلت اهرب قبل ما احمد يجي اي نعم ساعتها انا مكنتش عارف هو انا عايز اهرب منه ولا عايز اكلمه ولا اللي مضايقني انه بطل يتعرضلي خالص

والله ما عارف انا بس مش عايز حاجه توترني وبالذات ان فجأه وانا في الشغل لاقيت المهندس شكري بيرن عليا وطبعا كعادتي مردتش

حصلت حاجه غريبه اوي وانا مروح

متعود امشي من ناحيه الشمال وانزل محطة المترو من الباب اللي على الشمال اللي جنب صيدله الاسعاف بس مش عارف ليه النهارده لاقتني مشيت من الناحيه اللي على اليمين وقلت مش مشكله وانا معدي من جنب الكشك اللي قبل باب المحطه لمحت شنطه على ضهر واحد وقلت في بالي انا عارف الشنطة دي بعدها ببص على التي شيرت اللي لابسه الواحد لقتني برضه اعرفه كان الواحد ده بيبص في التلاجه بيأخد عصير او ميه بس طبعا مكنتش محتاج أركز عشان اعرف ان دي شنطه سفر احمد الصغيره وده البلوفر بتاعه يبقى ده أحمد

ووقفت وبعدين مشيت خطوه وبعدين رجعت تاني وخبطت على ضهره وسلمت سلام عادي فيه برود أكتر وقالي تأخد ايه قلتله لأ أنا أصلا كنت ماشي فشوفتك قلت أسلم

ومشيت وبعدها لاقتني متوتر هيتصل بيا ولا مش هيتصل ولو اتصل ارد ولا مردش ولو رديت وقالي نتقابل تاني اوافق ولا أرفض وكعادتي فضلت افكر في الموضوع وفي كلام ملوش اي لازمه وبعدين فجأه لاقيت دماغي نورت

ايه ده انا ليه مشيت من السكه دي

وايه الصدفه الغريبه اللي تخلينا في مكان واحد

ايه ده انا قريت الكلام ده النهارده الصبح عند فراشه

يعني كمان تصرفي ممكن يكون ليه تفسير

انا حكيت بس لسه مرتحتش مش عارف ليه

يمكن لأني بجد مش عارف ايه المتعب في موضوع احمد

مقدرش اقول ان احساسي بالذنب زاد بعد ما هو بطل يتكلم معايه

بل على العكس هو بطل يحسسني بالذنب وانا بطلت ابص في وشه عشان محسش بالذنب

يالا مبقتش تفرق كلها كم ساعه وارجع الشغل وانا متوقع ان الاسبوع هيكون مزدحم بالشغل جدا جدا

ربنا ييسر الامور

حفله وداع

أمبارح كانت حفل وداع المهندس محي
كانت مختلفه عن حفله وداع المهندس محمد كمال السنه اللي فاتت مش بس عشان المكان اللي قعدنا فيه ولا عشان جو القعده لكن عشان المشاعر اللي جوه القلوب اكتر

كان لسه جوايا التوتر من كلام احمد اليوم اللي قبلها لما كان شايف اني لما اديته المفاتيح اديتهاله بشكل مش كويس ولما علق قبلها على اني مش بضحك في وشه انا مش عارف هنفضل عاملين لبعض مشكله لأمتى بس ساعد ان احمد كان اجازه امبارح وموصلش الشركه غير قبل الميعاد اللي هننزل فيه بشويه صغيرين

لما وصلنا الكافيتريا اختاروا نقعد في ركن العائلات وبالذات انه في الهواء الطلق وهنكون براحتنا اكتر وعشان كمان اللي منهم هيشرب شيشه ميضيقناش اوي بالدخان

كان المهندس محي وانا على شماله وجنبي ايهاب او هوبه زي ما ممتعود اقوله وجنبه شريف وجنبه عصام وجنبه محمد ابراهيم او خله زي ما متعود اقوله وجنبه خالد وبعدين احمد اللي كان على يمين محي

كان الجو العام عادي الجو الطبيعي لمقابلتنا بره الشغل في المرات النادره اللي بنتجمع فيها بره الشغل كان الكلام معظمه عن المهندس الخياط مديرنا العزيز او المهندس محمد كمال مديرنا السابق او بعض الزملا الموجود ومنهم والغير موجود

بيتهيألي اللي حصل بيحصل في اماكن كتير كان في كلام كتير من اللي اتقال اتحكى عشرات المرات ده كمان احيانا واحد منهم يقول للتاني قلنا لما حصل مع فلان كذا بيبقى نفسي ساعتها اقوله مش انت عارف القصه ده مش بعيد خالد وشريف الجداد يكونوا هما كمان عارفينها

من المواقف المش طريفه لما لاحظت وجود قطه في المكان وده عيب الاماكن المفتوحه ومكنتش قطه واحده كانوا اتنين فطلعت رجليا الاتنين فوق الكرسي وضميت رجلي عشان مفيش منهم حاجه تعدي من جنب رجلي واصرخ وتبقى فضيحه وحظرتهم من الموضوع عشان ميرجعوش حد فيهم يقولي كلمه رغم اني عارف ان اللي منهم عايز يقول حاجه مبيقولهاش

شويه وحسيت بحاجه بتتحرك بين رجليا لما اتسهيت ونزلت رجليا على الرض شويه واللي ساعد ان المهندس محي قالي أوعى وهو بيحاول يزغزني فطبعا عملت التصرف التقليدي مني وصرخت ومن غير ما ابص لأحمد حسيت انه بيبصلي البصه المعتاده وكأني كنت قاصد اني اصرخ وحذرتهم ان حساسيتي من القطط بجد وحشه مش كويسه
الموقف المش لطيف التاني لما كان في على تربيزه جنبنا تلات شباب وواحد منهم ضحك وهما كانوا بيتريقوا على ضحكته وبعدها مش عارف مين بيقول ايه فأنا ضحكت ضحكتي الممبتذله اللي حاتم بيقول انها مفتعله واللي عارف اني مش بضحكها غير وانا متوتر او مش مبسوط أو عايز اعند مع حد

لغايه اللحظه الحاسمه قبل ما نمشي لما قالوا كل واحد هيقول كلمه للمهندس محي وهنبدأ بيه وهو هيقول كلمه وطبعا أتكلم وقال انه أتعلم من الهواري كتير واكم من المرات اللي الهواري ساعده فيها وان عصام زميل كفاح وابتدوا شغل تقريبا في وقت واحد وان محمد ابراهيم طوال فتره شغلهم سوا وهو نعم السند ليه وانه اتعلم منه حاجات كتير وطبعا منسيش انه يقول ان ادبي ميختلفش عليه كتير وعشان مكنوش بجحفه حقه هو ما وقفش زي كتير عند ادبي اللي بيتكشفوا انهم يقولوا الحقيقه وهي هبلي مش ادبي بس مش مشكله الغريبه انه قال انه اتعلم مني بس طبعا كمل بعدها الجمله اللي بسمعها من كتير في الشركه انه اتعلم مني اللي شكري علمهولي بس ده كان شيء متوقع انه اسمعه لكن اللي متوقعتوش لما قال اني صبور وانه كان نفسه يتعلم مني الصبر

أنا صبور؟
هو علل الموضوع باني بصبر على أي حد بيطلب مني حاجه ومش بقول لحد لأ وبساعد الناس رغم انهم بعيونهم شافوا قبلها بدقايق لما تليفوني رن وكان رقم مش متسجل وعلى غير العاده رديت لاقيت على الطرف الآخر بيقولي محمد قلت آه قالي محمد مين؟ فضحكت أنت مش عارف انت طالب محمد مين؟ فقالي محمد سمير قلت آه قالي اللي رقمه اخره 1234 قلت آه هو مش أنت اللي طالب برضه
المهم حسيت ان الصوت مألوف وربنا الهمني بالاسم فقلت على الكردي فقالي آه وبعد السلامات سمعني الكلام اللي مش بحب اسمعه من انه مش بيبطل تفكير فيا واني دايما على بالي وان الكلام ده بيوترني بصراحه لأني ببقى عايز الخلاصه اللي بعد الكلام وانه مفيش داعي يخدر دماغي بالكلام اللي ملوش لازمه ده في الأول وفعلا لأقيته بيقولي انا نجحت في التمهيدي وعايز نقطه أحضر فيها الماجيستير تفتكر احضر في ايه؟
أتوترت أوي وحسيت اني مقصر واني مفروض اعمل حاجه وان مينفعش اني بس اقوله معرفش وخلاص او احاول افكرله في موضوع للبحث فلاقتني بقفل التليفون واشيل البطاريه وبعد شويه وصلتها لاقيته بيرن وساعتها ايهاب عرض عليا انه يرد بس انا رفضت وشيلت البطاريه تاني من التليفون وشيلته في الشنطه كان بقالي كتير اوي مش بعمل الحركه دي وممكن اكتفي بأني أعمل الحركه اللذيذه بتاعت تحويل المكالمات بس لاقتني مش عايز اشوف التليفون خالص وكل اللي بيرن في وداني صوته وهو بيقول انه بيفكر فيا
فمكنش بيتهيألي بعد ده كله المهندس محي يقول عليا صبور وبحب أخدم الكل
بعد ما خلص المهندس محي كلمته كان مفروض نبدأ أحنا وبطبعيه الحال هنبدأ من اليمين اللي هو أحمد واللي طبعا كالعاده قال لخالد اتكلم انت يا خالد سيبوني انا دلوقت وخالد لأنه لسه جديد معانا فقال بس انه اتعلم من المهندس محي قله الأدب عشان دايما اشتكي انا من خالد ان لسانه ابيح واشتكيه لمحي اللي يشتمه بأباحه هو التاني بعد خالد محمد ابراهيم قال سيبوني للآخر واتكلم عصام وشريف وهوبه ولما لاقيت الدور عليا قلتله انا مبتكلمش واترميت في حضنه زي ما بعمل على طول وبعدين مفروض كان احمد يتكلم بس كالعاده قال لمحمد أبراهيم يتكلم واللي بصراحه قال كلام واو خالص
قاله انت عارف ان اخواتي كلهم بنات وكان نفسي في اخ وانت بجد اخويا ومش هتكلم عن الشغل عشان انا عبرتلك عن ده امبارح وغلبته دموعه وكلام كتير وكان الموقف مؤثر وبعدين طبعا أحمد أختتم الكلمه الأخيره كالعاده وان طبعا لازم نكون كلنا نسينا نقول حاجه مهمه جدا أكيد عارفينهما بس نسينا نقولها رغم انه قالهلنا كتير وهي ان معدن المهندس محي كويس او زي ما قال بالظبط الكور بتاعه كويس
مش عارف ليه كنت مخنوق منه وهو بيتكلم رغم ان هو ده احمد ده التيبكل بتاعه في الكلام والتصرفات بس مكنتش حابب اني اسمع الكلام ده أنا عارف ان احمد هيفتقد المهندس محي جدا لنهم كانت بتجمعهم مواضيع على أنفراد ومحي كان بيحب يكلمه وياخد رأيه بس بيتهيألي أحمد كمان من الناس اللي بتفضل على اتصال كويس مع الناس على عكسي

كان في نهايه القعده اللذيذه الخبر المعجزه من عصام ان المهندس شكري رجع من دبي وعايز يشوفنا وان يفضل خميس الاسبوع الجاي او اللي بعده ومش عارف ليه كنت من جوايا شبه متأكد أني مش هروح

كان خلاص صلاه العشا فأحمد مشي وقال أنا رايح اصلي رغم انه متأكد أننا كمان هنروح نصلي حتى لو مش كلنا بس بعضنا بس هو حر وبصراحه كنت حابب اني اروح اصلي في مكان تاني عشان ماضطرش اني اروح معاه بس لاقيت عصام بيقولي يالا وفعلا رحنا نفس الجامع اللي كنا صلينا فيه المغرب قبلها وخرجت من المسجد وبعدين عصام وبعدين شريف وبعدين شويه كتير وبعدين أحمد وكانت مشيئه ربنا اننا احنا الاربعه بس اللي نفضل عشان عصام وشريف طريقهم سوا على الجيزه وانا واحممد طريقنا سوا على المترو

عصام كان عايز يعاتب أحمد على كلمه قالها لما محمد أبراهيم كان بيتكلم على السبورت اللي كان محي بيعملهوله وكلام محي عن ان مشكله محمد ابراهيم ان محدش من المديرين بيعملوع سبورت ورد أحمد وقال عصام هو اللي هيقتل محمد أبراهيم بعد ما انت تمشي وعصام زعل على ما يبدو من الجمله واحمد قاله انه كان بيهزر بس أنا لاقيتها فرصه كويسه اني اخد شريف ونمشي احنا وورانا أحمد وعصام وبالذات انهم قالوا نمشى جامعه الدول لغايه ما نوصل تاني عن هارديز وكل منا يتجه اتجاهه وفعلا وصلنا واضريت اترك شريف مع عصام وامسي مع احمد ولصعوبه وجود ميكروباص للمترو عن هارديز فكان لازم نتمشى للميدان ورغم ان المسافه قصيره بس كان نفسي تخلص رغم اني مش عارف ليه لغايه دلوقت كنت ماشي مشيتي البطيئه مش السريعه

فجأه لاقيته بيقولي الراجل بتاع الحزامات بيسلم عليك ففهمت أنه راح اشتري الحزام اللي كان عايز يشتريه واللي قالي من فتره ابقى اشتريهوله واللي بسببه بطلت اعدي من وسط البلد عشان لما يسألني مبقاش بكدب وانا بقوله منزلتش وسط البلد

فجأه لاقيت ميكروباص معدي فشورتله وببص لأحمد فشورلي بأيده أنه هيمشي فأنا شورت بدماغي اني هركب وسيبته وركبت ومش عارف اللي كان موترني طول الطريق أني تصرفي كان قليل الذوق ولا خوفي من انه ممكن يتصل ويقولي نتقابل ولا ترقبي للمكالمه
مش عارف بس حاولت الهي نفسي في اي حاجه كان نفسي ارغي مع حاتم بس هو كان عنده يوم صعب في الشغل فأتصلت سلمت وقفلت والحمد لله احمد ما اتصلش

صحيت النهارده مش مبسوط مش عارف ليه فضلت في البيت وبعدين نزلت واخدت معايه هديه حاتم عشان الفها واشتري كارت وشنطه ليها وكمان اشتري كتاب ولما روحت عمر بوك ستورز لاقيتهم قافلين ورحت دار الشروق لاقيتهم برضه قافلين فكسلت اعدي الناحيه التانيه من الشارع عند مدبولي وبالذات لأني مش بحبهم اوي هناك فرحت محلي المفضل للكروت والهدايا ولفت الهديه واشتريت كارت وشنطه ولغايه دلوقت مكتبتش جوه الكارت حاجه
لما رحت الشركه كان أحمد مع المهندس يحي في حوار متصل من جانب المهندس يحي وحتى لو مكنش في حوار مكنتش هطول ورحت على مكتبي بس مش عارف ليه مكنتش مركز مشعارف ليه بحط احمد في دماغي هو دايما يستغرب من برودي ولا مبالتي بس هو ميعرفش ايه اللي بيحصلي كان أمبارح بيدور في دماغي سؤال ياترى مين فينا أنا وهو عنده قدره أكبر على تحمل الألم النفسي مش عارف انا ليه شاغل دماغي بيه وكنت عايزه يكلمني ولا كنت خايف انه يكلمني
لما نزل هو من الشركه بعدها لاقتني مش قادر أقعد في الشركه أخدت بعضي ونزلت وفضلت في البيت مش عندي قدره أني أعمل أي حاجه لغايه ما جتلي رساله على الموبيل ففتحت مدونتي وبعدين لاقتني بكتب كل اللي حصلي

أرتحت خلاص

8/4/2009

أمبارح كان يوم شويه طويل ما بين الشغل والصداع الجامد اللي مسكني والمغص الأجمد اللي سيطر عليا لدرجه اني فكرت استأذن من الشغل بدري بس طبعا مقدرتش

وبعدين حصلت المفأجأه لما قامت الخناقه في الشغل بين شريف والمهندس محي

وبعدين طقوس نقل حجاتي لمكتب محي عشان أستقر فيه

وبعدين ترتيبات خروجه المهندس محي واللي أتأجليت للنهارده

وبعدين تعليقات أحمد اللي أبتدى يخرجها من جواه ويسمعهالي بس بيتهيألي مش هديله الفرصه وابين ان في حاجه بتأثر فيا

أنا أصلا جبله ومش بحس

رحت المكتبه أمبارح وللأسف مقدرتش أمارس هواياتي المحببه في الفرجه على الناس والكتب لأني يادوب دخلت أخدت كم كتاب وخرجت على طول

شغاله دلوقت أغنيه دنيا سمير غانم على الراديو

تعالى أمانه حبيبي أمانه منك متحرمنيش

عديت أمبارح من قدام الجامعه

ياااااه كانت أيام

7/4/2009

النهارده لغايه دلوقت يوم مش تمام بجد الحمد لله علي كل حال

تصرفاتي اوفر اوي من أول اليوم وتحديدا بعد ما اخو أحمد أتى للزياره

كنت في مكتبي ومرحتش أسلم عليه رغم ان الناس كلهم كانوا متجمعين في المكتب اللي جنبي ومحمد أبراهيم جالي عشان ياخدني وكان بيغريني بأن أخو أحمد جاي باللبس الميري يعني ممكن أخد الكاب بتاعه ألعب بيه زي المره اللي فاتت بس انا قلتله أنا في أيدي شغل

وفعلا كنت من الصبح بعمل شويه شغل هسس بس انا عارف ان كان ممكن يستنى بس مكنتش عايز أروح

وبعدها لما كان يحصل ويكون حد في مكتبي ويقولي تعليق كنت أضحك ضحكتي اللي بقول عليها خليعه وحاتم بيقول عليها مصطنعه

وعديت من قدام مكتبهم كذا مره وانا رايح للمهندس خياط او راجع من عنده بس برضه معدش أسلم وحتى لما كان المهندس خياط وانا في مكتبه يقولي تعليق كنت أضحك بطريقه مفتعله وسخيفه

كان الموضوع كله موترني

مش عايز حد يبصلي ومع ذلك كنت بلفت الأنظار لأن صوتهم كان عالي وبالتالي انا رفعت صوت الاغاني عشان اعرف اركز في الشغل وصوتهم ميشوشرش عليا ومع ذلك سمعت لما محمد سأل هو مين مشغل الاغاني وعصام قاله اني انا

بعدها كان أحمد بيحكي الموقف بتاع امبارح لما مستر برني طلب شغل وكان كل واحد فينا شغال في الجزء اللي يخصه وبعدها قلتلهم انه قالي اننا نعمل الشغل مره تانيه بطريقه تانيه وأحمد أنفعل وقالي انه مش هيعيد الشغل

أنا تعبان

أخدت من عصام الصبح دوا للمغص ومع ذلك مرحش ومع ذلك مرحمتش نفسي وطول اليوم أكل شيبسي رغم ان كل الناس بتقولي ان اللي بيتعبني هي الحاجات دي

أخدت كمان قرص بندول وبرضه الصداع مش عايز يروح وبرضه منزلتش العياده اخد تحويل واشوف اخره كل ده ايه

مستر برني اخر رسمه شافها قالي دي كويسه وحسيت انه مبسوط بس انا لسه مش مبسوط

بعد الغيبه

بيتي ده وحشني
غايب عنه بقالي كتير
أمبارح كان يوم بكل المقاييس بشع الحمد لله
أول يوم شغل بعد انقطاع للتدريب مدته اسبوعين
كان يوم سفر حاتم
آخر اليوم المهندس خياط قالي أدي التقرير لهاري عشان يجهز رد


المشكله كانت في البيت مع اسلام

مفتكرتش الندوه بتاعت شريف غير بليل وكان الوقت أتأخر


ياه أطلب مني شغل هبقى أرجع تاني

أنا فرحان

فرحان أوي

الحمد لله

يوم الخميس حاتم كان في الشركه وفضلنا سوا ونزلنا سوا واتغدينا سوا واتمشينا سوا احنا مش بس اتمشينا احنا تمشينا كتيرررررررررررررررررررررررررر أوي

اتمشينا من المهندسين لوسط البلد وفضلنا نلف في شوارع وسط البلد وبعدين اتمشينا من وسط البلد لكوبري القبه والأهم اننا أتكلمنا

ضايقته ساعات بكلامي بس أتكلمنا

او بالاصح أنا أتكلمت لأنه كالعاده مش بيتكلم

بس المره دي كان عايز يسمع

ويوم الجمعه فضلت في الشركه لغايه بليل وقريت شويه كويسين في الورق النيله اللي مش عايز يخلص بتاع الاكلبس وكان صعب نتقابل عشان هو كان عنده ظروف بس لما ظروفه خلصت كلمني ونزلت من الشركه وقابلني عند المترو واتمشينا لغايه البيت وكملنا كلام

أنا مبسوط

أفتكرلي

افتكرلي اي حاجه كانت حلوه مني

مش حجرح تاني البك حبيبي خلاص سامحني

انا مش عارف ابعد عنك

اني مش عارف حتى اعيش

واللي تاعبني بحبك اكتر

وانت بعيد وما بتشوفنيش

معقول قادر تسبني وفراقنا سهل عندك

عديهالي عشان خاطري حبيبي دنه حتى منك

آآه آآه
انا مش عارف
انا مش قادر آه
انا مش عارف ابعد عنك انا مش عارف حتى اعيش
آه آه
انا مش عارف ابعد عنك
انا مش عارف حتى اعيش
واللي تاعبني بحبك اكتر
وانت بعيد وما بتشوفنيش
ايامي حبيبي فبعدك والله مبيعدو
انا ايه خلاني اخترت البعد لما انا مش ادو
انا مش عارف
انا مش قادر

18/3/2009

أمبارح كان يوم الحمد لله
كلمت حاتم عشان اشوفه راح التأمينات ولا لأ لاقيته هناك بيجيب الشهاده فكتر خيره بعد ما خلص كلمني فقلتله هتروح؟ فقالي نتقابل في وسط البلد؟ فقلتله لأ فقالي أعدي عليك في الشغل واتفقنا انه هيقابلني عند الشركه وظبط نفسي على كده
اتصل بيا بعدها عشان كان لازم يروح
حاولت اكلمه بعدها مردش وبعدين بعتلي ان بعد خمس دقايق هيكون في البيت ويكلمني وفعلا بعد خمس دقايق كلمني من البيت ومش اتخنقنا بس قفشنا على بعض هو كان عايز يشوفني عشان ياخد مني حاجه وانا قلتله بلاش نتقابل الموضوع تطور بس بعدها لاقيت نفسي نزلت من الشركه واشتريت العصير اللي بيحبه وركبت المترو وقلت هعدي عليه في البيت اسيبله الحاجه اللي طلبها واروح
بعد ما نزلت من المترو لاقيته بيطلبني وبيقول انه محتاج الحاجه ضروري فقلتله اني كده كده كنت جيله بس ياريت ينزل أدهم اخوه ياخد الحاجه مني المهم بعد مفاوضات وصلت تحت البيت وهو رفض اي حل غير اني اطلعله ويارتني ما طلعت

يوم الجمعه اللي قبل اللي فاتت اخر مره خرجنا فيها كان بدايه قراري اني متكلمش تاني وتحديدا لما كنا في السينما بنتفرج على الفيلم الغريب واحد صفر والموضوع قلب دراما بعدها لما اتمشينا ورفضت اني اتكلم وانتهى النهايه الدرامتيكيه بأنه سابني في الشارع واليوم اللي بعده لما اتقابنا جنب البيت برضته رفضت اتكلم والموضوع برضه قلب دراما وسبني تحت البيت عندي ومشي بعد ما حسسني اني اد ايه زباله وقذر اني مش مقدر ظروفه وبعد ما كالعاده بدأ يحكي شيء من اللي مضايقه بس عشان مزعلش ويوم الاحد يوم سفره أتكررت المأساه بشكل أكبر لما كان في الشركه عشان سفره ووقف اتكلم مع الناس كلها ولغايه عندي سلم وقالي انا هنزل اقف في الشارع لغايه ميعاد السفر وده برضه ليه عشان مردتش اتكلم

ولما بعت يقولي اننا بنتلكك لبعض عشان برضه كل اللي قلته اني مش عايز اتكلم
ولما بعت يقولي اني لما صدقت عشان بطلت اتكلم بعد ما كنت أبتديت أتكلم لما قالي انه مش بيكون عايز يعرف برضه كان السبب عدم كلامي ولما بعت يقولي أحنا بنبعد كان برضه اني مبتكلمش هو السبب

وعشان كده مكنتش عايز اننا نتقابل عشان لو اتقابلنا انا مش هتكلم وهو مش هيتكلم وهتكون مقابله اخت للمقابلات اللي قبليها ومكنتش عايز ده يحصلي تاني ومش عايز أزعله تاني انا شرير ومش كويس دي مفروض تكون مشكلتي انا

لما روتله مكنتش عايز اتكلم ولما الأمور بقيت دراما حسيت بالذنب اني مزعله ومكنتش عايزه يبقى المحرك لتصرفاتي وبالذات انه بيفضل يقول انه كويس ومش زعلان

مش عارف الامور بقيت دراما
هو انا غلطت لما قلت مش عايز اتكلم تاني
هو انا كده ببعده لما بقول مش عايز اتكلم تاني
هو كل اللي بينا هو كلامي وبس ولو قررت اني متكلمش شويه يبقى كل اللي بينا بينهار
هو زعل اوي اني رفضت اننا نتقابل وكم مره كان بيقولي اسباب الله اعلم فين الحقيقه فيها ومنتقابلش يعني لو كنا اتقابلنا وكان حصل زي كل مره وده فعلا اللي حصل امبارح ده بيكون كويس
لأ مش بيكون كويس
بعد ما نزلت من عنده بعتلي رساله ان الحلقه السبعتاشر من جراي نزلت على النت وبيقولي اسامح وبيقول انه بيحبني كم كلمه مفيش غيرهم بس تعبوني هو فعلا مبقاش يعرف عني حاجات كتير ميعرفش اني شفت الحلقه ميعرفش اني مش محتاج انه يكتبلي بحبك في رساله لأن زي ما هو بيقولي لما اقوله اني مش زعلان ويقولي مش بالكلام

معرفش ايه اللي خلاني اكلمه من البيت بس كنت مخنوق


بفتقد رسايله اللي كان بيبعتهالي الصبح وبليل
بافتقاد صوته
بفتقد كلامه
بفتقد اني احكي معاه

17/3/2009

أمبارح كان اليوم في الشغل لا يطاق رغم ان عدم وجود أحمد كان مساعدني كتير الحمد لله ومقلل الضغط عليا بس كمان موضوع التدريب الاسبوع الجاي استهلكني بصراحه وعلى آخر اليوم كنت خلاص مش طايق

كلمت حاتم قبل ماأروح من الشغل وكانت مكالمه زي كل مكالمتنا الفتره الاخيره هو بصراحه مسألش فيا من ساعه مكالمتنا الصباحيه اللي كان بيسألني عن حاجه تخص أجراءات تعينيه وكانت مجموعه من المكالمات هاديه بس لطيفه وبعدين قطع من غير مكالمات لغايه الساعه تلاته او قبلها بشويه وقال انه عايز يشوفني وقلتله انه لو عايز هيعرف

كان نفسي نتقابل بره منتقابلش في المطريه بس مطلبتش المهم لاقيته مسألش فيا لغايه الساعه اربعه ونص فكلمته من الشغلوقلتله بلاش نتقابل حتى لما سألني هترجع أمتى ورغم أني كنت ساعتها أصلا نازل من الشغل بس قلتله هرجع متأخر فقالي لأ أرجع براحتك وانا مش هعدي عليك مش هقابلك غصب عنك

روحت أتغديت ولاقيته وحشني أوي كلمته في البيت وكأنت المكالمه بشعه زي عادتنا في الأيام الأخيره مش عارف انا بتصرف كده ليه

لأ انا عارف

بعدها فضلت اعيط فتره طويله

لاقيت حلقه جديده من جراي انتومي على النت نزلتها واتفرجت عليها ورغم ان مفيش حلقات جديده من اكتر من اسبوعين بس بالصدفه تنزل حلقه امبارح وبالصدفه كمان تكون كلها ان ازاي مش مفروض نبعد حتى لو اللي بنحبه بيبعد وعايز يبعد

كان يوم صعب لكن الحمد لله النهارده معقول

على الهامش

هقابل حاتم النهارده

قلقان قوي من تصرفاتي

مش عارف اعمل ايه

ربنا يستر

16/3/2009

أمبارح كان يوم ما يعلم بيه الا ربنا

وصلت الشغل لاقيت أحمد موجود سلمت عادي ودخلت على مكتبي وهات يكتابه بوستات الامس ودخل احمد بيقولي مش كفايه تكتكه عشان صوت الكيبورد يعني المهم بعدها حاولت أبدأ في شويه شغل بس الألو بعت لحاتم كلمني عشان أتأكد انه صحي عشان ميعاد الكشف بتاعه وصحي وراح وبعدين احمد اداني الشغل اللي كان معاه في غيابي وقالي انه كده خلاص خلاصه فأشتغلت فيه عشان اراجعه وواديه للمهندس الخياط ولما رحت للمهندس الخياط كان بيتكلم في التليفون فجيت أخرج قالي خليك وفعلا استنيت رغم ان اللي كان بيكلمه كان واحد اتقدم لواحده وطالبين منه حاجات كتير واللي فهمته انها من بلد المهندس الخياط او كده والمهندس الخياط كان شغال في دور الوسيط عشان يجيبله عروسه

المهم اديته الشغل وطلب مني شويه حاجات ورحت على مكتبي وشويه وهاري جالي يسألني أخبار الشغل أيه في فتره غيابي فضلت أفرجه على الشغل اللي كنت عملته في غيابه وخلاص

كان الغريب ان احمد كانت تصرفاته وكأنه زعلان مني

أخر معلوماتي اني مكنتش عملت حاجه جديده أنا مش بتكلم معاه وده مش جديد مش بقوله حاجه وده برضه مش جديد وآخر موقف كان مفروض يخليه زعلان من نفسه لكن مني أنا كان شيء غريب شويه وبصراحه عملت نفسي مش واخد بالي بس غلطت غلطه كانت مقابله قدام باب مكتبي باخد ورقه من على البرنتر وكان معدي وفي ايده ورقه فبص عليه بتركيز فقلبها وقالي بتبص على ايه فلما جيت ادخل المكتب بعدها رزعت باب المكتب يمكن أكون فعلا اضايقت بس اللي ضايقني اني لو حتى كنت متضايق مكنش مفروض اظهر ده واللي عملت حسابه حصل جاي وهو بيبتسم وكأنه حقق أنتصار عسكري في فتح ابواب قلبي الموصده وقالي انت زعلت ليه لما قلبت الورقه عشان متشوفش اللي فيها

كنت هرد واقوله انا اللي خلاني ابص انها واحده من الورق اللي كنت لسه بطبعه فكنت ببص اشوف دي ورقه من ورقي اللي كان على البرنتر وهو اخدها بالغلط ولا دي ورقه هو طابعها لأسباب خاصه بيه بس طبعا بما أني مبديش معلومات حتى لو كانت بسيطه فكان ردي هو أنا زعلت أصلا؟

خالد اللي معايه في الاوضه بيقولي مش هنتجوز بقى فقلتله لأ أنا بابا جبلي عريس وخلاص فضحك وفضلت اتندر بالموضوع بعدها كل ما اشوف حد اقوله خالد كان بيطلب أيدي وفعلا هزاري كان أوفر شويه زياده في اليوم ده بس لأني كنت متضايق شويه زياده وبحاول ده مش يظهر عليا وكمان كنت بضحك ضحكتي المفتعله جدا فاللي بتطلع ماسخه جدا وسمجه جدا وكمان خليعه جدا مع اسلوب كلامي وموضوع خطوبه خالد الخ الخ فكأني بعمل أعلان عن فتى مش اللي هو يعني شاب كده كده يعني بس يمكن شعان جوايا الاقتناع انه مش بالكلام اي نعم كمان انا تخطيت الكلام بالضحكه دي بس برضه مش مقياس

المهم لاقيت احمد ومش عارف اقول بكل برود ولا بكل اي بالضبط جاي يقولي لو سمحتش متتكلمش الكلام ده تاني وانا طبا بكل البرود برضه سألته أي كلام فقالي خالد خطيبي ومش عارف ايه وكمان ياريت متضحكش الضحكه دي تاني انا قلتلك قبل كده بس ممكن تعتبره طلب ولما سألته ليه قالي عشان ما بستحملش حد يتكلم عليك نص كلمه فقلتله ومين اتكلم رفض انه يقول او انه يقول الكلام كان أيه

يمكن يكون وجهة نظره انه بيقدملي خدمه وبغض النظر عن أني مش بحب اغير في تصرفاتي عشان خاطر حد بس برضه بطلت كلام في الموضوع بقيت اليوم وكمان بطلت اضحك الضحكه اياها

فضلت لغايه الساعه تلاته ونص مفيش اي اخبار من حاتم كلمته فقالي انه خلاص خلص كشف فقلتله سلام فتقريبا معجبوش الوضع فاتصل في المكتب كانت المكالمه بجد بشعه

أنا مش عارف اعمل ايه في الموضوع ده

روحت البيت ونمت اكتر من عشر ساعات عشان بعد ما روحت بساعه حاتم رن عليا فأتصلت بيه في البيت وكانت مكالمه تانيه اكتر بشاعه من المكالمه الصباحيه

بيقولي احنا كده بنبعد

بيقولي انه مينفعش يحكيلي عن حاجه عشان انا معنديش اللي اقوله

كل ردودي عليه بيكون فيها الجمله السخيفه اللي كأني مش حافظ غيرها الأيام دي وهي أنا معنديش كلام أقوله

يارب يسرلي الأمور

15/3/2009

اليوم كان عجيب غريب مريب شنيع كل الوصفات الغريبه دي كانت في اليوم
كنت في مكتبي في ميعادي وكان الساعه عشره فيه بريزنتيشن في الدور العشرين تبع شركه ما والراجل اللي كان بيشرح كان بريطاني وكل الناس كانت بتتكلم بعدها على أنه بيقص في الكلام فالكلام مكنش واضح انا كنت ساعات بفصل منه بس لأن الموضوع مكنش على مزاجي اوي وكمان لأن أحمد طول الوقت عمال يقول ياس امممم ابستلولي ريت فكنت عايز افصل منه

نزلنا من العشرين حاولت اشتغل في اي حاجه لغايه قبل الصلاه وبعدها احمد كان بيقول أن المهندس خياط قاله يسلمني الشغل اللي معاه اللي انا كنت سلمتهوله اصلا قبل ما أخد الاجازه بس هو قاله طيب وقالي انه مش هيسلمهولي إلا لما يخلصه الأول فقلتله طيب هو في بس حاجه انت نسيت تعملها في المكان الفلاني في الشغل ومكنتش بقوله كده عشان أرخم عليه ولا عشان اقول انه مقصر في شغل معاه بس كمان هو مفروض يكون عارف انه لما كمل في الشغل بعد ما المدير قاله يسلمهولي فهو مش بيعملي جميله لأني لما أستلم الشغل لازم هارجعه فأعمله من البدايه أفضل

هو اللي سألني لو في غلطات تانيه فكنت كل ما أراجع حاجه أقوله في غلط في كذا او في مشكله في كذا وهكذا لاغايه ما لاقيته هب فيا وقالي سيب الشغل ولما اخلصه هعملك بيه هاند اوفر وراجعه ساعتها براحتك قالتله زي ما تحب وفضلت اشتغل في شغل تاني كان عندي وقبل العصر قالي بعد الصلاه هديك الشغل وفعلا بعد الصلاه قالي ممكن أراجع الشغل والحاجات الغلط ياريت ابقى أقوله عليها فسألته أقوله بعد ما أعدلها ولا أقوله من غير ما أعدلها فقالي لأ بعد ما أعدلها فقلتله ما أنا لو عدلتها مش هفتكر قالي معلش قلتله خلاص هكتب اللي أعدله عشان أفتكر فاتأكدت أنه في مشكله ما في الموضوع والا ليه الأصرار على أنه يعرف الغلط فين

فضلت أراجع في الشغل لغايه سته الا ربع وبعدين كان لازم كمان أنزل عشان ميعاد دكتور العيون الساعه سته وكان عصام هيروح معايه فقلت أتصل بحاتم عشان هو خلاص خد القرار بعدم السؤال هو أي نعم اتصل بيا الضهر تقريبا لما صحى من النوم بس كان الكلام بينا غريب مكنتش بتكلم من ورا قلبي أوي يعني بس برضه مكنتش براحتي وقلتله أن مفيش حاجه بس أنا مش عندي كلام أقوله وكان كلامنا في غالبه مش لطيف وقفل وبعدين اتصل اعتذر ومسألش فيا باقي اليوم فقبل ما أروح للدكتور قلت أتصل أقوله وأتصلت وسألني ليه مقولتلوش قبلها وكنا رحنا سوا وقلتله هو مسألش فرد وقالي عشان مأعرفش وساعتها فضلت أفكر أنا دلوقت مش عايز أتكلم عشان كلامي من البدايه ممكن يكون خلى العلاقه بينا كلام من ناحيتي سكوت من ناحيته بس كمان السكوت دلوقت هيعلمنا الجفا وشويه في شويه هيكون هو كمان ميعرفش عني حاجه زي ما انا معرفش عنه حاجه

أحمد دخل الأوضه وأنا بكلم حاتم مكنش يعرف كالعاده انا بكلم مين وعارف أنه لسه زعلان من اليوم اللي قبلها ومش قادر أحدد هو أمتى قلب زعله من نفسه إلى زعل مني أنا لغايه ما كنت عنده كان مفروض التسلسل الطبيعي انه زعلان ن نفسه ليه فجأه بقى زعلان مني مش عارف
المهم كان بيقولي اني كده اخدت منه هاند اوفر بالشغل لأنه أجازه نهايه الاسبوع فسالته مش الاجازه الأربعاء والخميس زي ما قلتلي قبل سابق قالي لأ قلتله طيب أيه وليه الأجازه فمرضيش يقول وقالي هو انا كنت عرفت سبب أجازتك أيه شعان أقولك سبب أجازتي أيه مش عارف هو تحديدا كان بيرد على الموقف ده ولا عشان في العموم لأن في نفس اليوم كنت بساله عن عصام وكنت بسأل عن عصام عشان أشوف هنروح الكشف سوا ولا لأ لأنه هو كمان كان عايز يكشف بس لما أحمد سألني عايز عصام ليه مردتش أقوله فقالي لو كنت هتسأله عن حاجه في الشغل ليلتك هتكون بيضا فضحكت وسكت

أنا مش بقوله عن حاجه وده مريحني لكن هو مش عايز يقولي عن حاجه وبيبينلي أن ده مش مريحه لكن بيعاملني بالمثل ميعرفش ان ميتعبنيش اطلاقا اني معرفش انا اللي بيتعبني انه يحسسني اني السبب في تعبه فسالته ببساطه هيريحك انك متقولش يا أحمد قالي أه قلتله خلاص وانا مش هسأل تاني طالما ده اللي يريحك

نزلنا أحنا التلاته وهو سبنا على باب الشركة وانا وعصام روحنا الكشف وصلنا لاقينا مفروض هنستنى شويه نزلنا صلينا المغرب وطلعنا وفضلنا في الأنتظار المرير لغايه العشا وبعدين دخلنا نكشف كنت انا اللي بكشف الأول والدكتور بيقولي ها أيه الأخبار فقلتله الرد التلقائي بتاعي حلو الحمد لله فضحك وقالي واخبار العين

بعدها قالي مقاسات النضاره مش هتتغير بس ممكن ترجع تلبس عدشات تاني مفيش مشكله فقلت تمام ممكن اعملها والبسها في المكتب وبس وبكده مش هيكون في المشاكل بتاعت زمان من التعرض للشمس او التراب واللي بيعملولي مشاكل مع العدسات وانا بكشف حاتم بعتلي مسدج يسألني أنا روحت ولا لأ فأتصلت بيه بعد ما نزلت من العياده واتكلمنا وسألني هيشوفني ولا لأ وبعدين قالي جملته الشهيره اللي في الايام الأخيره مش بسمع غيرها منه أنا في البيت لو حبيت تكلمني ونتقابل

انا مش مفروض أضايق من الكلمه دي زي ما الفروض اني مش اضايق لما بيسبني في الشارع ويمشي عشان أنا أه قلتله كتير ان معنى كلمه زي دي اننا مش هنتقابل غير بس لو انا حبيت او انا عوزت واني لو رفضت يبقى مش هنتقابل بس هي دي طريقته في التعامل مع الامور

روحت البيت واتغديت وكانت اختي بتتكلم في التليفون من ساعه ما دخلت وكان اخر رصيد معايه في الخطين اللي اتكلمنا بيه في أخر مره فأستنيت لغايه ما اختي خلصت تليفونها وكلمته كانت الساعه تسعه فسألني أنت مكسل مش كده؟ ومتقبلناش


مش غلطه منه يمكن غلط مني أنا طالما عايز اشوفه كنت هشوفه بس الظاهر اني بقيت انا كمان ببعد

14/03/2009

أمبارح كان يوم غريب مريب عجيب
كنت في الشركه والصداع هاجم عيوني ففضلت اروح
كنت بتكلم ان حاتم بيبعتلي يقولي صباح الاخير ويقولي بليل احلام سعيده بس امبارح معملش حاجه من الاتنين ده عمل حاجه اعجب واغرب ما كلمنيش من الصبح غير الضهر لما وصل القاهره عشان يشوف لو كنت في البيت نتقابل بس للأسف كنت في الشغل ومكلمنيش تاني بقيت اليوم
L
قررت اني اروح احلق بعد المغرب لأن شعري بقى لا يطاق ودقني كمان طويله شويه
وانا عند الحلاق لاقيت رقم من الشركه بيرن مردتش وقلت أكيد أحمد وبعدين رن تاني فالحلاق خرج وقالي اتكلم براحتك
رديت وقلتله كلمني بعد خمس دقايق عشان مش هقدر أتكلم وفعلا خمس دقايق وكان بيرن تاني بس مردتش عشان كنت لسه بحلق فضل يرن كتير وعشان كده اول ما خلصت قلت ابعتله كلمني شكرا عشان ميرجعش يعمل حوار وبالذات انه متصور انه من ساعه ما اتكلم يوم الخميس وانا قررت قرارات وهو خايف من قراراتي دي لأنه على حد قوله ما يستحملش اني ابعد عنه
يجوز
بدل ما اكتب رقمه كتبت رقم حاتم ودي مش اول مره بعملها عملتها مره في ثانويه عامه وخسرت صديق عزيز بسبب كده
ما اكتشفت اني بعتها لحاتم بدل أحمد إلا لما لاقيت حاتم بيكلمني فسألته هو أنا بعتلك كلمني فقالي أه قلتله انا بعتها غلط كنت ببعتها لرقم تاني فزعل وقفل وقالي عشان زمانك مستني الرقم التاني وقال حاجه عن اني مش عايز اكلمه بس مش عارف ازاي ما اخدش باله انه متصلش غير لما وصلتله رساله
مش عارف ليه بينسى اني قلتله اني مش زعلان منه بس كمان معنديش كلام أقوله وبالتالي مكنتش هتصل بيه واقوله انا بتصل بيك عشان مش عندي كلام أقوله

المشكله كانت الرساله اللي بعتهالي بعد كده بعت يقولي

مش هتتصور عمرك الكلمتين دول عملوا أيه فيا دلوقت ولا هتعرف طول ما ربنا مديني العمر عشان مش هقولك عمري بس اتأكدت أنه حاجه مش حلوه أبدا

مش عارف كعادتي في المواقف دي تنحت جدا لأني مش عارف ليه مكذبتش وكملت المكالمه عادي من غير ما أقوله
بس مبحبش احساس اني بخبي حاجه عمد
مش عارف
أحمد كلمني وقالي نتقابل قلتله ماشي وانا ناوي اني هعتذر بعد شويه واتحجج ان الوقت بقى متأخر
بعتلي حاتم تاني يقولي
انا اسف على الكلام السخيف ده مش فكرت كويس قبل ما اكتبه مش كان المفروض اقول كده
وبعتها مرتين زياده تأكيد عن أني انا كان مفروض مقلش اللي قلتله بيتهيألي

أحمد فضل يتصل تاني وقلتله اني بره وان الوقت اتأخر فكلمني بتون الصوت اللي بيحسسني اني السبب في أكبر مشاكل الدنيا
وان يمكن يكون رفضي اني اقابله هيكون سبب في تسونامي آخر
بعد سلسله مكالمت قلتله خلاص مسافه السكه
وفعلا روحت له كان نفسي اقول للتاكسي استنى عشان انا مش هتأخر بس طبعا مبقاش في تاكسي بيستنى في الزمن ده
الغريبه ان لاقيته متخيل أن كلامه يوم الخميس ليه سبب في زعلي
فضل يتكلم كلام كتير وانا طبعا بيرن في وداني
قاعد كأنه ملاك قصادي بيقولي ننسى اللي فات في ثانيه كلامه داخل من الناحيه دي طالع هوا من الناحيه التانيه
مش عارف ليه الناس مبتعترفش بالحقائق
ليه كل حاجه يحولها عليا
ليه بيكون الموضوع يخصه صرف ويفضل يقولي كلام من عينه عشان خايف عليك عشان بحاول اسعدك عشان اتن مش عارف ايه
كان الغريب لما استعمل الكلمه السحريه
مكنتش بتأثر وان كنت ببدي غير كده لغايه ما فجأه لاقيته بيقول أنه بيحبني
تنحت كالعاده
هو عرف منين ان دي الكلمه السحريه معايا مين اللي قاله
بس مش عارف ليه على غير العاده قلبي ما اتفتحش اول ما سمعت الكلمه يمكن لأن تاريخنا سوا كان حافل شويتين ويمكن عشان تون الصوت بيكون ليه تأثير وهو للأسف خانه تون الصوت
أو يمكن عشان السبب الحقيقي وهو اني محستهاش صادقه

مش عارف ليه ساعتها افتكرت اول مره استخدم جمله اني احبك في الله ايام الثانويه العامه واني ازاي كنت بحسها اقوى من كلمه بحبك بس
كنت بحس انها مرتبطه بالدين وعشان كده أقوى

الغريبه ان امبارح وبعد انقطاع دام خمس شهور على الأقل أتصل وليد
لسه فاكر المره الوحيه اللي خرجت فيها مع وليد كنا في وسط البلد من حوالي تسع شهور وكان بقالنا فتره طويله كل اللي بنا الشات وبس ولسه فاكر وهو بيغني اغاني ام كلثوم وعبد الوهاب
مش عارف ايه اللي فكره تاني بيا وامبارح بلاذات وفي الوقت اللي بين رساله حاتم الأولى وأصرار احمد على اني اقابله

سواق التاكسي اللي ركبت معاه وانا راجع من عند احمد كان غريب او الأصح كان مريب
يارب يكون يومي النهارده كويس