وهبدأ بأني اكتب ايه اللي بيحصلي كل يوم وهبدأ من أمبارح
الامس السبت التاسع عشر من مايو
صحيت الصبح زهقان شويه وانا السبت عندي اجازه من الشغل ومع ذلك اوقات بروح الشغل
ونزلت وسط البلد
قلت هتمشى شويه واقعد في اي مكان هادي اريح اعصابي اللي دايما تعبانه
وانا بتمشى بتفرج على المحلات اللي معظمها لسه مفتحش فلاقيت في حفله في السينما الساعه عشره الصبح فدخلت
كان فيلم
spider man 3
كان لطيف بس بكيت في النص مش عارف ليه
يمكن لاني كئيب بطبعي
ويمكن لان البطله صعبت عليه شويه لما البطل عاملها وحش شويه مش عارف
المهم ممكن بعد فتره ابقى اعمل بلوج تاني عن الافلام اللي بشوفها سينما ورأي فيها
بعد السينما حسيت اني مش عايز اروح فقعدت في مطعم اتغديت
وبعدين اتمشيت شويه وفي الاخر
روحت على البيت قعدت قدام التليفزيون
وبعدين اتفرجت انا والعيله على شريط فرح اختي
و مقدرناش نتقابل انا وحاتم بقيت اليوم لانه كان للعاده مش فاضي
بس ودخلت نمت على الساعه عشره مساءا
صحيت النهارده الساعه سته تقريبا
لبست ونزلت على الشغل وانا دلوقت في الشغل بتصفح بعض البلوجز وطبعا مبعملش حاجه في الشغل
بس انا النهارده هتمرد على الوضع ده وأبدأ كل يوم اضع خطه للحاجات اللي عايز اشتغل فيها بدل الكسل ده
الى اللقاء للغد
2 comments:
ألف مبروك البوست الأول وعقبال المليون
تحياتي
انسانه
مرسيي كتير
وعقبال انتي كمان مع البوست المليار
Post a Comment