اخيرا الحياه بقى لونها بمبي
امبارح كان يوم ممتاز
رغم اني معروف عني الكأبه المفرطه
بس الاعتراف بالحق فضيله
في الشغل كنت بطبق على برنامج جديد اي نعم لم انجز الا القليل ولكنه كان جيدا
وهربت من الشغل الساعه تلاته وقابلت حاتم في وسط البلد اتغدينا
واشترى تي شيرت لفريق كوره مش عارف هو مين
عشان الحاجات دي لا تستهويني بس على ما اعتقد انه تشيلسي او حاجه شبهه كده
وانا كمان اشتريت شويه حاجات ليا
وبعدها اتمشينا شويه وبعدين كلمنا رضا
وقابلناه في العجوزه وعديت تاني من عند شركتي
والنهارده اكتشفت ان م أ و أ هـ اللي معايه في الشغل شافوني
المهم استمتعت بوقتي جدا مع حاتم ورضا
وقعدنا في كافيه جديد كان لطيف
وكان اكتر حاجه بتحسسني بالسعاده اني حسيت اني بكسر الحواجز اللي مضياقاني
وهي ان حياتي بتدور حول الشغل وحاتم
اه انا بحب حاتم
واه هو كل حياتي
بس بحس ان الناس دايما بتبعد عني
وانه هو كمان هيعمل زيهم في يوم ويبعد عني
وعشان كده لازم افضل على اتصال دائم بكل الناس
مش خوف اني ابقى لوحدي في المستقبل قد ما احساس اكبر بالامان
اتكلمنا امبارح في حاجات كتير
خطوبه رضا وشغله الجديد
ربنا يوفقه في الاختيار المناسب
وانا كلمتهم عن شغلي
الغريب اني لما اتكلمت عنه حسيت اني ممكن اكون بحبه وانا مش واخد بالي
وان احلامي القديمه باني احقق حاجه ممكن تتحقق
بعد كده روحت البيت على الساعه تسعه ونص
ومقدرتش امنع نفسي من الخناق مع ماما
وكان عندنا عمار ابن اخويا وابن عمي الضيف الدائم
فضلينا قاعدين نرغي لغايه الساعه حداشر وبعدها نمت
صحيت مكسل شويه عشان لخبطه مواعيد النوم
واول ما وصلت الشغل حسيت بمغص جامد
بس الحمد لله انا دلوقت احسن
انا طول عمري بعاني من مشاكل المعده
اه صحيح كنت هنسى امبارح وزنت نفسي وطلعت اتخن من حاتم وطلعت فوق الوزن المثالي باتنين كيلو
خســـــــــــــــــــــــــــــــــــــــــــــاره
كنت زمان نفسي اتخن ودلوقت نفسي ارفع
امبارح قلت اني هكتب افكاري الجديده للشهر الجديد
وفعلا كتبت مجموعه من الافكار هحاول انقحها-والله انا كويس في العربي اهو- وانشرها في بوست منفصل
ملحوظه
رضا كان دايما يقول اني بستعمل التعبيرين منفصل ومتصل كتيررررررر
No comments:
Post a Comment