يوم الاجازه اخيرا
صحيت بدري في ميعادي العادي رغم اني مكنتش ناوي اروح الشغل كنت مكسل وعايز اخد اجازه
وكالعاده قعدت شويه على النت اول ما صحيت وبعدين لما ربنا فتح على حاتم وصحي كلمني
مش عارف حسيت بعد ما كلمني اني عايز اهرب
عايز اخرج وهو مش ناوي يخرجني
كلمني تاني بعدها وانا كنت لابس قلت لو ابدى استعداد هقوله يالا وننزل سوا لو لم يبدي هنزل لوحدي وبعدين قلت انا كده بظلمه انا هقله انا خارج واشوف المهم قلتله انا رايح الشغل وفعلا كنت ساعتها بفكر اروح الشغل بس هو لم يبدي اي تأثر كالعاده وعادي عايز تروح روح مش عايز ماترحش
نزلت من البيت
وفضلت شويه في المترو وبعدين خرجت اتمشيت في وسط البلد وبعدها دخلت المول لافيت شويه وبعدين قعدت في كافيتريا المول وفضلت قاعد
وفي واحد اعتقد من الناس الشغاله في المحل قعد يبعتلي صور بالبلتوث لغايه ما اتخنقت وفي الاخر صورني وبعتلي صورتي انا
فحسيت اني مخنوق
كلمت حاتم ومحصلش جديد
قلت همشي وكانت الساعه قربت من تلاته
بعدها فضلت في مكاني متحركتش لغايه الساعه اربعه ونص
يعني فضلت في مكاني حوالي اربع ساعات
خرجت بعدها اتمشيت وبعدين اتغديت بره
وفي المطعم حصل حاجه غريبه
قعدت على تربيزه وكان قدامي شاب قاعد لوحده سنه مايزدش عن عشرين سنه وعمال يبصلي بشكل مريب حبتين وانا في الفتره الاخيره من حياتي اتعلمت حاجه مش كويسه خالص اني ابص للناس في عينيه واركز
حسيت انه من الاولاد اللي مش طبيعين وانا بيصعب عليا شويه الاولاد الصغيرين في السن اللي عندهم المشكله دي
المهم خلصت اكلي وخرجت وهو كان خرج قبلي وشفته بره
مش هنكر اني كنت مستني اننا نتكلم عشان اتاكد من حدسي
المهم كلمني وطلع من الشباب اللي بيدوروا على راجل يحبهم ويبقى كل حياتهم وانا سمعته
الغريبه انه قال انه كان عايز يكلمني لاني شبهه
مش عارف ليه قال كده
طلب رقم تليفوني اديتهولي
وقالي هنفضل على اتصال واخد الايميل بتاعي
وهو دلوقت بيكلمني على المسينجر
مش عارف انا ليه بجاريه في الكلام ليه مش بقوله بس انا مش عايز اسمعك انا عندي مشاكل كتير ومكفياني واللي انت فيه ده انا مليش ذنب فيه
وانا مش زيك
كلنا لينا اخطأنا بس انا خلاص زهقت
قعد يكلمني انه بيفكر في الانتحار وانه عايز ينهي حياته طيب وانا
بعد ماسيبته كملت تمشيه ومش عايز اظلم حاتم هو كان بيكلمني مره كل اربع ساعات
وفضلت ماشي وكل شويه اقول حاتم هيجيلي هوعايز يشوفني مش هيسبني
وبعدها روحت قعدت في مكاني المفضل
على الكورنيش عند فندق شيبرد
وفضلت قاعد حوالي ساعتين
بعدها اتمشيت على الكورنيش
ومش عارف كنت بفكر في الانتحار ولا هو اللي كان بيفكر فيا بس انا عارف ان الانتحار حرام
وبعدها وانا مروح حاتم كلمني وبعدين قلت اخد خطوه وامري لله فبعتله رساله اني هكون عند المترو بعد عشر دقايق وروحت مكنش وصل واتقابلنا وحصل اللي كنت خايف منه
مفرقش معاه انه شافني في حاجه
هو متكلمش ماحولش يسمعني يعني انه شافني مخلاش يومه احسن ومريحوش طيب كان ليه التعب ليه كان عايز يشوفني ليه بيعذبني هو عارف اني عايز افضل معاه طول الوقت وهو اللي عنده المشكله فخلاص بلاش يعذبني
روحت وحسيت اني عايز اكلمه لاقيته هو اللي بيطلبني قبل ما اطلبه
هو مش طلبني هو بعتلي كلمني شكرا ودي عشان المستقبل رساله مجانيه
المهم كلمته فقالي انه مش عايز يتكلم ولا يسمع
قولتله الامر والطاعه مولاي
خلاص وقت ما تحب تتكلم هكون موجود عشان اسمعك وانا مش مهم بقى اذا كنت عايز اتكلم او مش عايز
قالي لو عايز تتكلم فانا مش هكون مركز معاك
بعدها اتفرجت على فيلم انجلينا جولي اعتقد اسمه الحياه في سياتل
بيرفع شويه من روحي المعنويه ونمت الساعه اتناشر وصحيت بدري بس فضلت في السرير للساعه تسعه ومجليش نفس اروح الشغل
فنزلت قعدت في السيبر ومن ساعتها وانا هنا بكتب وكان بيكلمني طارق اللي انا قابلته في المطعم
واللي هنشر حواري معاه قريبا
يارب ساعدني
ملحوظه
خالد كلمني على الموبيل فضل يرن فتره طويله المهم طلب انه يقابلني والمره دي عمل حسابه وطلب ان الميعاد يكون بعد تلاته عشان اكون خلصت شغل
واتفقانا على الميعاد والمكان بس لسه مش عارف انا هروح ولا لأ
هو انا عارف بس لسه مش متأكد
أخر حاجه انا بكتب البوست ده من عند حاتم في البيت
No comments:
Post a Comment