امبارح كان يوم مقبول مش سيئ يعني
كالعاده كان الشغل مش كتير وده لان المهندس ش كان مش موجود فكنت مع نفسي طول اليوم
بعد الشغل كان حاتم مستنيني خرجنا اتغدينا بره وبعدها اتمشينا شويه
وكان في بوادر خناقه بس ربنا ستر
روحت على البيت وبعد ما اخدت دش اكتشفت اني مروحتش الاستوديو اجيب صور اختي فكلمت حاتم ونزلنا سوا
واخدنا معانا عمار ابن اخويا
وحاتم قالي على الخبر السعيد وهو فرصه الشغل الجديده ربنا يارب يتمها على خير
رجعت بعدها مليش نفس اعمل حاجه وكمان كان في مباره في التلفزيون
ونظرا لوجود ابن عمي عندنا عشان امتحاناته فاضطريت اني اسيبها رغم ان كان في فيلم حلو على
mbc2
بس كده كده انا كنت عارف اني مش هعرف اشوفه عشان ميعاد نومي
بس ونمت في ميعادي وصحيت في ميعادي وجيت كمان الشغل في ميعادي
ده عن يومي امبارح
بس عن نفسي مش عارف
حاسس بحاجه ناقصه
مش عارف هي أيه
حاسس ان حياتي بقيت من غير طعم ولا لون
مش عارف اهتماماتي بقيت أيه
حقيقي بقيت محتار
نفسي أحس بالسعادة
لأ
نفسي قبل السعادة احس بالراحه
ونفسي قبل الراحة احس بالأمان
انا ليه خايف
انا ليه قلقان
حقيقي محتار
1 comment:
عارف المشكله انك دايما حاسس ان فيه حد هايلومك
على كلمه قلتها,تصرف عملته,حاجه قصرت فيها,شئ مش عايز تعمله
مش عارف ده احساسي بس المشكله الكبيره انك اتاكدت ان الكلام ده مش هايحصل بس بقيت قلقان بالتعود
وقريب انشاء الله هاتعديني
وانا المناعه عندي ضعيفه
ربنا يستر
Post a Comment