11-Jun-07

الدنيا ربيع والجو بديع

لا مش دي

انا عندي زكام رهيب خلاص حاسس اني هموت

لا مش دي البدايه

امبارح كان يوم الحمد لله ممتاز

كان عندي شغل كتير مش قوي يعني بس اشتغلت كويس وكان عندي مشكله في الاكلبس وكنت حلمت بحلها اول امبارح والحمد لله طبقته ونجح

افتكرت ايام الكليه لما كنت احلم بحل المسائل الصعبه وانا نايم واصحى القى اللي حلمت بيه مظبوط الظاهر بكون في قمه ذكائي وانا نايم

وخلاص على ميعاد المرواح وماشي لاقيت المهندس وليد عايزني اعمل شغل وكان هشام ورضا مستنيني في الكليه وكان رصيدي خلصان وكنت محول التليفون وكانت هيصه

فضلت اقولهم خمس دقايق واوصل من الساعه تلاته للساعه سبعه

اكتر حاجه اكرهها لما ادي ميعاد واتاخر عليه وان كان ده والحمد لله مش بيحصل كتير بس بضايق منه لما يحصل واخيرا وبعد انتظار وصلت عندهم

الجو كان كويس بس كانت دايما حاسس اني ناقصني حاجه او بالاخص ناقصني حد كان نفسي حاتم يكون معانا بالذات وهو امبارح قدم استقالته من جلوبال سنتافي وارتاح منهم ربنا يكرمه بشغل قريب

وفضلت مع هشام ورضا لغايه الساعه تسعه تقريبا هشام مشي وروحت انا ورضا وهربت منه وقالتله هعدي على اختي في شقتها عشان اعدي على حاتم

كلمته ونزل قابلته وقت مش طويل بس احسن من مفيش روحت البيت على الساعه حداشر وكنت هتجنن وانام وفعلا اكلت لاني مكنتش اكلت اي حاجه من اليوم اللي قبله وقعدت شويه مع اختى والاخ الصغير كانوا بيتفرجوا على فيلم على تو لميل جيبسون كنت شفته سينما من فتره ومع ذلك كان فاضل فيه شويه صغيره قلت اقعد معهم بعدها دخلت نمت وكالعاده بقالي يومين بقلق بليل على صوت بابا وهو بيتكلم مع ماما بعد رجوعه من الشغل وبيكون صوته عالي وكانه بيتكلم من قاره وهي بتسمعه من قاره تانيه

صحيت النهارده كسلان وهتجنن وانام ومع ذلك وصلت الشغل قبل كل يوم بحوالي خمس دقايق ولا حاجه وقابلت المهندس وليد عند الاسنسير وقالي ايه اللي جايبك بدري كده ولا انت كل يوم على كده قلتله لا انا كل يوم كده النهارده

بس بدرت شويه ومن ساعتها وكل شويه يطلب مني حاجه اعملها لما خلاص هتجنن واروح رغم ان كان نفسي اعدي على المكتبه النهارده وخصوصا ان بكره اجازه المكتبه ومش هقدر اروح بكره

ربنا يقدرني واكمل اليوم

اه كنت هنسى امبارح اتصالحت انا وهواري جالي المكتب وسألني انت متغير ليه

قالتله مفيش قالي يبقى مفيش غير انك عايز التعامل يبقى رسمي

المهم بعد شويه كلام ابتديت انا اتكلم عادي انا مش عارف الهواري انسان كويس وانا بيتهيالي دايما بقول اني بتخنق من تصرفاته بس انا معجب بيه واحنا اكتر من زمايل اكيد مش اصحاب بس اكتر من زمايل

المهم

كفايه كده كتابه النهارده عشان الشغل كتير