الامس الجميل واليوم اللعين
مش عارف ليه مش متفائل لليوم النهارده
امبارح كان يوم انجاز في العمل
هو مكنش شغل هندسه كان شغل على رأي الناس هنا هسس بس كان مضيع الوقت كله
كانت بجهز للتقرير السنوي للشركة بما اننا في موسم نهايه السنه الماليه
مش عارف مين اللي عمل اختراع ان السنه الماليه تنتهي في شهر سته ليه مش في اي شهر تاني ويتزامن مع التقرير السنوي الكتاب السنوي
اختراع فاشل كده للشركه مليان بالاشكال البيانيه اللي مفروض يتعملها تجديد لغايه نهايه شهر السته ومش عارف ازاي هعملها تجديد والشهر لسه شغال بس قالولي اتصرف وفعلا اتصرفت
وفضلت في الشركه لبعد ميعاد الانصراف
وكان حصل قبل ما امشي من الشركه حدثين
الاول محمد سعيد كلمني وقالي انه جاي القاهره يزورني وبعدها اتصل اعتذر عشان ظروفه مش هتسمح
واختي داليا بعتتلي رساله عشان تسألني تجيب ايه هديه لشيري وهي راجعه من السفر وانا قلتلها متتعبيش نفسك
بعدها خرجت من الشركه وعديت على المكتبه وحصلت على اربع روايات جديده وسألت على الدوره التدريبيه لاقيتها هتبدأ في نهايه سبعه وانا مروح عديت على شيري علشان كنت كلمتها وانا في الشغل وقلتلها هعدي عليكي فضلت معاها شويه واتغديت معاها وبعدين نزلت من عندها قابلت حاتم بس هو كان تعبان شويه او زهقان مني
وبعدين روحت لاقيت عمار عندنا لعبت معاه شويه وبعدين سيبته ودخلت انام عشان كنت تعبان وكان ميعاد نومي عدى
رغم ان قيلم
city of angles
كان شغال على او تي في وانا كان نفسي اشوفه مره كامل ومع ذلك قلت النوم احسن
ويارتني ما نمت حلمت بكابوس رخم متعلق بالمهندس موسى
مش فاكره كله دلوقت بس اللي فاكره انه كان في مشكله وانا مقدرتش اساعده وانه كمان زعلان مني
اكيد ده بسبب اني متخوف من مقابلاته وخصوصا ان النهارده نهايه الاسبوع ومفروض اكلمه عشان اقابله
المهم كملت نوم وصحيت النهارده وجيت الشغل زي كل يوم ومن الصبح الامور عماله تتوالى
الاول اكتشفت ان النهارده عيد ميلاد عبادي فبعتله رساله وبعدين اكتشفت ان حاتم بيتشقى من ورايا وبيكتب كومنتس عند ناس وناس بتكتب عنده كومنتات وبيكتب بوستات من ورايا
يالا ربنا يسهله
والهواري دخل عليا وانا بكتب البوست فاتلغبطت وبوظت نص الشغل اللي انا شغال فيه من امبارح ربنا يسها وبعد ما اخلص البوست اعرف اصلحه بسرعه
واخيرا اكتشفت ان النهارده سنويه بابا انسانه الله يرحمه ويغفرله ويغفر لجميع موتى المسلمين
عايز اخلص شغل بسرعه النهارده وفي نفس الوقت مش عايز اروح بدري لان بابا هيكون في البيت
اي نعم عمار هيكون هناك وانا بحب العب معاه بس بابا هيكون موجود وده كفيل بانه يخليني اتأخر
يارب سامحني على مشاعري اتجاهه
والنهارده ميعاد الشخصيه الاسبوعيه ولسه محتار ومش عارف انفذ نصيحه حاتم واسهب في الحديث عن شيماء اكتر رغم اني كنت قفلت الباب ده وانا بصراحه مش مع الفكره دي اوي
ولا أبدأ شخصيه جديده
ولو هبدأ شخصيه جديده ياترى هيكون احمد ولا حد تاني
هنشوف أرجع اخلص شويه شغل كفايه كسل كده
No comments:
Post a Comment