الحياه بالشكل ده معقوله يارب تدوم
انا كنت في الشغل وكلمني محمد سعيد بس انا قلتله مش هقدر ازورك عشان عندي امتحان وقررنا انها تكون الاسبوع القادم وكمان عشان يكون حاتم مسافر فميضعش مننا يوم
انا نزلت يوم الجمعه اللي هو طبعا امبارح من الشغل على الساعه 12.30 وروحت المكتبه عشان الامتحان وفضلت موجود وحصلي هناك حدثتين قبل الامتحان
الحادثه الاولى ان نضارتي اتكسرت وده هيترتب عليه ضروره الاسراع في تنفيذ الخطوه المؤجلة وهي عمل الكشف وتغيير النضاره او الرجوع مره اخرى للعدسات
والحادثه التانيه اني بعد ما عيني طلعت في اختيار مجموعه من الكتب لإستعارتها في المكتبه رفضوا لان فتره الاشتراك قاربت على النفاذ ويرجى اعاده التجديد-على غرار يرجى اعاده شحن البطاقه وهي الرساله المسجله من شركة النقال- والله حلوه النقال دي
المهم
الامتحان لم يبدأ إلا الساعه 2.50 وحاتم المسكين كان مستنيني من 2.30
الامتحان كان معقول بدون الدخول في تفصيله ورغم مللي الدائم في كل الامتحانات من طول الوقت
فعلا حاجه غريبه اوي تلاقي الامتحان مفروض يبقى ساعه يعملوا وقته ساعتين ايه الحكمه في كده حاجه تجنن
وكمان كان الاخ الممتحن دمه تقيل رفض انه يخرجني قبل نهايه الوقت
خرجت قبل خمسه بشويه كان حاتم هيموت يعيني لان كمان المرقب طلب غلق الموبيلات
خرجت لاقيته وكالعاده دائما لازم يروح عشان في البيت مش قادرين يستغنوا عنه
وانا كنت هموت من الجوع وروحت من غير ما ناكل اي حاجه سوا
وروحت لاقيت المفاجأت السعيده في انتظاري
اولا لاقيت بابا في البيت
ثانيا لاقيته بيتغدى
ثالثا الغداء كان سمك
رابعا انا اتخنقت
فطبعا اتخنقت مع ماما كالعاده دائما
وفضلت طول الوقت مش لاقي حاجه اعملها فاتصلت بحاتم وفضلنا نرغي في التليفون وبعدها دخلت على النت بس مش لاقيت حاجه اعملها
وزرتنا اختي وجوزها وكان عايزني اعمله شويه حاجات على الكمبيوتر فضلت اعملها لغايه الساعه حداشر وهو قعدوا كمان شويه ففضلت ارغي معاها شويه وبعدين نزلوا وانا دخلت نمت على الساعه 12.00
ومع ذلك صحيت من بدري ومعرفتش انام
دايما يحصلي كده يوم الاجازه
اصحى بدري وانا متأخر وايام الشغل لو حصل مره واتأخرت في ميعاد نومي شويه مش بقدر اصحى الصبح حاجه تجنن
وبكده كان ملخص اول ايام الشهر الجديد هي عدم تنفيذ اي من الاهداف الا هدف واحد وهو الامتحان التعيس فقط لاغير
ربنا يستر على باقي الايام
انا لما صحيت مش لاقيت ليا نفس لحاجه روحت الشغل بس من ساعه ما وصلت مش بعمل حاجه وشكلي مش هعمل دايما الواحد يوم الاجازه لما بيوصل الشغل بيكون عنده الاحساس انه لسه اجازه فمش بيعمل حاجه
كنت بفكر اروح سينما النهارده بس لسه مقررتش وطبعا الاخ حاتم زمانه لسه نايم
فهصحيه دلوقت ونشوف اليوم هيمشي ازاي
وان كنت متأكد انه مش هيخرج لانه كالعاده مشغول في ايه مش عارف
كان الرب في العون
No comments:
Post a Comment