الشخصيه الاولى الجزء التاني والاخير

لمراجعة الجزءالاول

انا قررت اكتب الاسامي افضل لان ده هيساعدني في المستقبل وهفضل فاكر الاشخاص بأسمائها

تاني يوم روحت المدرسة متأخر وكنت هتعاقب على التأخير بس هو انقذني وقالي انه عايز يشوفني بعد الحصه الاولى

وفعلا بعد الحصه الاولى كنت رايح اقابله وقابلني الاستاذ محسن اللي كان شاهد على الموقف فقالي ان الاستاذ كامل ده شخصيه محترمه جدا وانه مكنش يقصد حاجه فقالتله اني رايحله عشان اعتذر ليه وفعلا روحت وفوجئت برد فعله

لاقيته بيقولي انا اسف انا مقصدتش اضايقك وان دي من المرات القليله اللي بعتذر فيها

وكان اول مره احس بأني في حد يهمه زعلى وحد في نظري مهم جدا لانه مدرسي وكلنا بننظر للمدرسين في المرحله دي نظره كبيره قوي وكنت فرحان قوي ويومها ابتديت علاقتي بيه تزيد يوم عن تاني

هو كان من صعيد مصر وكان قاعد في شقه لوحده وفي مره مشيت وراه بعد المدرسه وعرفت مكان سكنه ولما عرف بعدها قالي ياريتك كنت مشيت معايه وده في نظري كان فخر ليا

ومن يومها اتعودت اني ازوره في البيت ومن المواقف اللي عمري ما هنساها اللي حصلتلي في بيته المره انه كان بيأكلني فيها بأيده ويقولي انا عمري ما اكلت انسان قبل كده بس انت مش اي حد

والمره التانيه اللي كانت الكهرباء فيها مشكله وكنا قعدين على ضوء شمعه وكان طبعا كالعاده معايه القاسم المشترك بتاعي محمد سلامه وكان محمد سلامه نازل عشان يشتريلنا حاجه واخد الشمعه معاه وانا كنت خايف لاني بخاف جدا من الظلام

وساعتها مسك ايدي واقعد يقولي متخفش

ومع ذلك مكنتش الدنيا ماشيه وردي على طول

انا ايامها كنت طفل الى حد ما اقل من دلوقت وكنت بزعل من الهوا

على سبيل المثال كنا خمسه وكان دايما الناس كلها تتكلم اننا خماسي الفصل وكان من ضمن الخمسه محمد مصطفى اللي كنت بحس ان الاستاذ كامل بيحبه اكتر مني وكان بيقول انه راجل يعتمد عليه وكمان محمد حسن اللي كنت بشوف ان الاستاذ كامل بيكلمه اكتر مني ويقول عنه انه قد الكلمه انا مش قصدي انه مكنش بيقول عني حاجه بس هو كان دايما يتكلم اني زي البسكويت واني الناحيه الرومانسيه للمجموعه واني لما بحب بحب بجد ولما بزعل بزعل اوي رغم ان ممكن الموضوع ميبقاش مستاهل

ده غير زعلي انه مثلا ميخلينيش اجاوب على سؤال او يعاقب الفصل كله وانا معاهم فاخاصمه

اه موضوع العقاب ده ليه قصه

كان دايما يعاقب الفصل كله ويقولي انت واصحابك مش هتتعاقبه

فكانت الناس متضايقه مني

في مره حصلت مشكله بين ولدين وولد منهم راح للناظر يشتكي والناظر عمل مشكله مع الاستاذ كامل فقرر انه يعاقب الفصل كله وكان العقاب بالضرب على القدم

وعمري محصل فيا كده قبل اليوم ده

فزعلت يومها قوي وفضلت زعلان منه اكتر من اسبوعين

ويكلمني في الفصل مردش عليه رغم انه مدرسي

بس بصراحه انا من يومي وانا كنت بتعامل معامله خاصه وهو كان بيدلعني اكتر وبعدها قعد يصالحني

ومن الحاجات اللي عمري ما بنساها لما طردني مره من الفصل وكنت يومها اول مره برضه اتطرد

بس الموضوع ليه اصل

اللي حصل اني كنت كالعاده مخاصمه شويه عشان مبيخلينيش اجاوب على كل الاسئله في الفصل فكنت طول الحصه بكلم الولد اللي قاعد جنبي وهو يقول للولد بطل كلامه ويقوله مش انا اللي بتكلم وفاجئه الولد اللي ورايا قالي هات القلم بتاعي اللي انت اخدته

فقمت من مكاني وكان الفصل كله ساكت

والتفت للولد اللي ورايا وقالتله قلم ايه وفضيت شنطتي كلها وقعدت ازعق فيه فالاستاذ كامل قالي اطلع بره فرميت شنطتي كاني برميها في وشه وخرجت

وفضلت فتره بعدها استنى لغايه ما يدخل الفصل واخرج منه وما ادخلش الا لما الحصه تخلص ورغم ان ده ممنوع الا انه عمره ما قالي حاجه

وبعد فتره الاستاذ محسن قالنا على رحله طالعه الفيوم

وكنا طبعا هنطلع احنا الخمسه ومحمد سلامه قال للاستاذ كامل وخافوا يقولولي لاحسن ارفض اطلع بس انا وافقت وكان من احلى ايام حياتي يومها سألني اذا كنت بحبه ولا لأ وقالي انه بيحبني وفضلنا طول الطريق سوا لو قعدنا نقعد سوا وانام على كتفه ولو وقف اقف معاه ويسندني عشان متعبش ويومها كانت اغنيه واحشتني بصوت سعاد محمد اللي غناها خالد عجاج هي القاسم المشترك وكانت شغاله بصوت خالد عجاج وفضلت اغنيهالو وهو يقولي خايف ليه من بكره اقاله لنبعد عن بعض وهو ده فعلا اللي حصل بعد كده بس ده مش موضوعنا دلوقت

وفاكر لما اتجوز ورجع من الاجازه وكل ما يشوف حد يقوله خلي مادا-مكنش ده اسمي ايامها- يجي يزورني انا مستنيه ولما زورته مراته قعدت تقولي انه مش بيبطل كلام عني ويومها قعد يأكلني بأيده

لسه فس مواقف كتير جمعتني بيه ممكن ابقى اتكلم عنها في وقت تاني

بس اكتر حاجه خليته شخصيه مؤثره في حياتي

هو صبره على كل اخطائي واننا دايما هنلاقي فينا القدره اننا نلتمس الاعذار للغير وانك متفكرش انت اعطيت اد ايه لأ فكر انت لسه تقضر تعطي اد ايه

انك مش لازم تستنى اللي اقدامك لما يرتفع لمستواك ولو في فرق في السن بينكم متحسسش اللي قدامك بيه كان دايما يقولي انه شايفني اكبر من سني رغم اني دايما بتصرف تصرفات اصغر من سني بس هو كان شايف فيا عكس كده كمان الحب والتضحيه

هو حبني قوي معرفش على ايه فيا يتحب بس هو كان بيحبني ومكنش بيتردد في انه يعبر عن حبه ده

واكتر حاجه بقى هي ان ده خلاني احب التدريس اكتر واكتر

لان المدرس بيزرع جوه لطلبه الاف المبادىء والافكار وانه ليه دور كبير قوي في تكوين الشخصيه خاصه في السن اللي احنا كنا فيه

اه على فكره هو كمان كان بيكتبلي هو يمكن اللي حبب ليا اني اعبر عن مشاعري بالكتابه كان دايما يقولي لو زعلان اكتبلي وقولي ايه اللي مزعلك متستناش انك تقولي بالكلام

انا فعلا حبيت الراجل ده بجد وكنت اتمنى ان اللي حصل مكنش يحصل بس هو ده انا ودايما بجبر الناس انها تبعد عني

انتهت الشخصيه الاولى والى اللقاء الاسبوع القادم مع الشخصيه التانيه اللي لسه مستقرتش هي شخصيه مين