13-Jun-07

امبارح كان يوم نصه حلو نصه مش حلو

امبارح اولا المهندس شكري رجع الشغل والمهندس وليد كان غايب وعشان المهندس وليد كان في شغل مفروض يعمله فالمهندس شكري هو اللي قام بيه وكنت مشغول معاه طول اليوم بس كنت مبسوط لان كان كله مبني على شغلي مع المهندس وليد في اليومين اللي المهندس شكري كان غايب فيهم والحمد لله مكنش فيهم غلطات ربنا يستر والنهارده ميطلعش فيهم القطط الفاطسه بس كان في شويه لغبطه في شغل الهواري ومحمد ابراهيم

كنت هزعل من الهواري مرتين امبارح هو كان متوتر لان المدير العام كان زعلان منه وده اول تعامل بينهم فكان متوتر شويه بس الموضوع خلص بدري بدري

روحت في ميعاد الشغل عادي

كانت ماما صحتها احسن الحمد لله بس كان البيت لسه كئيب

التلفزيون كان في قمه الملل كان في فيلم على ام بي سي تو لهريسون فورد مش فاكر كان اسمه ايه كان قديم بس قبل نهايته لبست ونزلت

قولت هروح لحاتم رغم اني عارف انه مشغول بس قلت يمكن الراجل اللي عندهم في البيت مشي ويقدر ينزل واشوفه بس اول ما وصلت عندهم لاحظت الانوار فعرفت انه لسه موجود فكلمت حاتم وكنت لسه تحت البيت بس مقلتلوشوروحت مش لاقيت حاجه اعملها ونمت في ميعادي والنهارده وانا في طريقي للشغل غلطت غلطه غبيه نزلت في محطه مترو غلط واتعطلت شويه

ربنا يسها ويوم الشغل النهارده يخلص عشان انا مليش نفس للشغل اصلا ومش عارف اذا كنت هخرج بعد الشغل ولا لأ بس هشام ورضا هيتقابلوا وممكن اقابلهم وكمان عايز اروح المكتبه وانا عارف ان حاتم اكيد هيكون مشغول النهارده كمان

اما نشوف اليوم هيمشي ازاي اخلص بقى الشغل اللي ورايا وبلاش كسل