النهارده يوم ممل شويه
امبارح كان كويس الحمد لله
خلصت الشغل وطيران على البيت
ماما بس اللي كانت في البيت وبعد الغدا والفرجه على مسلسلي المفضل
اختي اتصلت وكانت عايزني اعدي عليها في البيت
نزلت روحت لها وقعدت معاها وبعدين قالتلي ان جوزها هيبات في الشغل وهي مش هتقضي اليوم عندنا واتفقت مع اخويا الصغر انه يبات عندها فاضطريت اني استناه لغايه ما وصل وكانت الساعه وصلت تسعه او تسعه وربع كلمت حاتم واتقابلنا اول ما نزلت من عندها بس طبعا لان الوقت متأخر مقدرناش نفضل سوا كتير
روحت ودخلت في السرير مباشره ماما كانت بتشتكي من زوجه اخي
فسمعتهالها قليلا وبعدين سيبتها ودخلت انام بقالي فتره بظبط التليفون على ميعاد الفجر واصحى بس انام تاني لغايه ميعاد الشغل ومضايق من نفسي بسبب الموضوع ده أوي
النهارده كنت صحي ومش كان جيلي نوم أوي ومع ذلك نمت
ربنا يغفرلي ويرحمني ويقدرني اني اقوم الايام الجايه
في الشتا كنت بتعلل بالبرد دلوقت مفيش أي حاجه حرام عليا كده
صحيت النهارده ووصلت الشغل وكنت عارف ان المهندس شكري أجازه النهارده بس انا عندي شغل كتير بس من شويه اصابني الملل ومش عندي أي رغبه في العمل نهائي
ده غير ان محمد كان على الكمبيوتر وخفت انه يشوف البلوج ان شايف انه حاجه شخصيه ليا مش حابب انه يشوفها عشان كده لازم احرص ان مفيش حد يقعد على الكمبيوتر بتاعي تاني
وكمان محمد عمل حاجه زعلت حاتم مني
وهي اني كنت من فتره فاتح اميل حاتم عشان اشوفه اون لاين ولا لأ عن طريق اني أشوف أخر رسايل فاتحها فمحمد شاف الأميل ساعتها وعجبه شويه رسايل من منتديات
النهارده طلب مني اني افتحله اميل حاتم عشان يشوف المنتديات دي ويسجل فيها
فتحتهاله بحسن نيه وكان بيتفرج على الرسايل وكلمت حاتم بعدها وقالتله وطبعا هو زعل
حقه لان ده حاجه شخصيه بيه
مش عارف حاسس ان اليوم النهارده هتكون فيه كميه ملل كبيره بفكر اخرج بعد الشغل وممكن اروح أي مكان أو أروح سينما
وكمان لأني يمكن مقدرش أخرج يوم السبت لأن أختي هتكون عندنا ولما كنت عندها أمبارح لاقيت نفسيتها تعبانه ومحتاجه تغير جو شويه
ربنا يستر واليوم النهارده يعدي كويس بدون مشاكل
1 comment:
انا مش زعلت لكن الموقف رخم
كان ممكن تقوله هانزلك كل العناويين ف ورقه
المهم الموضوع اتفه من اننا نتكلم فيه
انا زعلت من ان الناس بتستغل ان الواحد كويس معاها وتتمادى
انت الكويس وهو اللي بيتمادى
للتوضيح بس
وبعدين اهو يوم وهايعدي
مش ده كلامك
Post a Comment